Grýzııa qazaqstandyqtarǵa bilim grantyn bóldi
ASTANA. KAZINFORM — QR Halyqaralyq baǵdarlamalar ortalyǵy Grýzııanyń joǵary oqý oryndaryna oqýǵa qujattar qabyldanatynyn habarlady. Ótinim 26 mamyrǵa deıin qabyldanady.
− QR Ǵylym jáne joǵary bilim mınıstrligi men Grýzııanyń Bilim, ǵylym jáne jastar mınıstrligi arasynda joǵary jáne JOO-dan keıingi bilim men ǵylym salasynda yntymaqtastyq kelisimi aıasynda Qazaqstan azamattaryn 2025-2026 oqý jylyna qabyldaý maqsatynda bakalavrıat, magıstratýra jáne doktorantýra baǵdarlamasy boıynsha bilim alý múmkindigi ashyldy, − dep jazdy ortalyq.
Ortalyqtyń habarlýynsha, jalpy sany 5 grant bólingen – 2 bakalavr, 2 magıstratýra, 1 doktorantýra oryndary. Mamandyqtar tizimi ortalyq saıtynda kórsetilgen.
Ótinim men qujattardy 2025 jyldyń 26 mamyryna deıin Elektrondyq úkimet» portaly (Egov.kz) arqyly nemese «Halyqaralyq baǵdarlamalar ortalyǵy» AQ-da qolma-qol tapsyrýǵa bolady.
Úmitkerlerdi irikteý úshin táýelsiz saraptamalyq komıssııa músheleri onlaın suhbat ótkizedi, úmitkerlerdiń materıaldaryn qaraıdy jáne qorytyndy komıssııa sheshimi shyǵady.
Upaı teń bolǵan jaǵdaıda jetim balalar men ata-anasynyń qamqorlyǵynsyz qalǵandar, múgedektigi bar balalar, kóp balaly otbasynan shyqqan balalar, aýyldyq eldi mekennen shyqqan, sońǵy 2 jylda aýyldyq eldi mekende turatyn úmitkerler basymdyqqa ıe bolady.
Aıta keteıik, búgin Qazaqstan Grýzııa aýmaǵyna kelgen QR azamattaryn kirgizbeý faktileri jıilep ketkenine jáne olardyń keıinnen elden shyǵarylý jaǵdaılaryna alańdaýshylyq bildirdi. Bul rette Qazaqstan azamattarynyń basym bóligi Grýzııaǵa týrıstik maqsattarmen keletini jáne qabyldaýshy eldiń zańnamasyn berik saqtaıtyny atalyp ótti. Óz kezeginde grýzın tarapy Qazaqstan azamattarynyń Grýzııa aýmaǵyna kirýi men bolýyna barynsha qolaıly jaǵdaı jasaýǵa daıyn ekenin bildirdi.