Grekııadaǵy orman órti: ıahta ekıpajy qamaýǵa alyndy

ASTANA. KAZINFORM – Grekııanyń Gıdra aralyndaǵy orman órtinen keıin 13 adam qamaýǵa alyndy, bılik órttiń shyǵýyna «Persefonı» ıahtasynan ushyrylǵan otshashý sebep boldy dep otyr, dep habarlaıdy BBC. 

Grekııanyń klımattyq daǵdarys jónindegi mınıstri Vasılıs Kıkılıastyń habarlaýynsha, juma kúni shyqqan órt Afınanyń ońtústigindegi áıgili týrıstik araldaǵy jalǵyz qaraǵaıly ormannyń 300 sharshy metrin sharpyǵan. 

Jalyn aýyzdyqtaldy, alaıda bul ońaıǵa soqqan joq. Jaǵajaıǵa baratyn jol joq bolǵandyqtan, órt sóndirýshiler oǵan teńiz arqyly jetýge májbúr boldy, al tikushaqtar sýdy áýeden túsirdi.

Grek aqparat quraldary qamaýǵa alynǵandardyń barlyǵy «Persefonı» sýperıahtasynyń ekıpaj músheleri ekenin habarlady. Saltanatty ıahtalardyń birneshe dıleriniń málimetinshe, keme jaldaý 249 myń eýrodan bastalady.  

V.Kıkılıastyń aıtýynsha, memlekettik aıyptaýshy kemeni tárkileýdi talap etken.

Birneshe jergilikti BAQ sot qujattaryna silteme jasap, ıahtada Grekııadan ketip qalǵan 17 qazaqstandyq azamat bolǵanyn habarlady. Alaıda, VVS muny teksere almaǵan.  

Jeksenbi kúni tańerteń ekıpaj birdeı jumys formasyn kıip, betterin kúnnen qorǵaıtyn kózildirikpen, maskamen jáne qalpaqpen jaýyp, Pıreı prokýratýrasyna kirgen kezde beınege túsip qalǵan. 

Jergilikti BAQ-tyń habarlaýynsha, órt sóndirý qyzmetiniń mamandary jaqyn mańdaǵy keme kapıtany bergen málimet boıynsha, «Persefonıdan» belgi berý raketasy nemese otshashý ushqanyn habarlaǵan. Alaıda, jaǵalaý kúzeti bul aqparatty rastaıtyn eshqandaı dálel joq ekenin alǵa tartyp otyr.  

Órtke sebep bolýy múmkin degen boljamdy estigende birneshe orman órtimen kúresip jatqan Grekııada narazylyq týyndady. Budan bólek jyldyń alǵashqy ystyq tolqynyn bastan keshirip jatqandyqtan olarǵa ońaı tımedi.

«Keıbir adamdardyń qaraǵaıly ormanǵa otshashýdy sonshalyqty jaýapsyz laqtyrǵanyna ashýlanamyz», - dedi Idra meri Iorgos Kýkýdakıs senbi kúni Grekııanyń ERT telearnasyna.

Grekııa seısenbiden beri orman órtterine qyzý daıyndyqta otyr. Bılik aptap ystyq pen qurǵaq kún raıyna, qatty jel men joǵary temperatýra saqtalyp otyrǵan jaz maýsymyna daıyndyqty barynsha údetti.