Grekııada órt qaýpiniń joǵary deńgeıi saqtalýda

ASTANA. KAZINFORM – Grekııa bıligi eldiń tanymal kýrorttyq aımaǵy sanalatyn Kefalonııa aralynda tótenshe jaǵdaıǵa daıyndyq rejımin saqtap otyr, dep habarlaıdy National World.

Sıtýatsııa áli de turaqsyz kúıinde qalyp otyr.

Bıliktiń málimetinshe, aýa raıy jaǵdaıynyń jaqsarýy men órt sóndirýshilerdiń úılesimdi jumysyna qaramastan, araldaǵy qatty jel men qurǵaq ósimdikter kez kelgen sátte jańa órt oshaqtarynyń tutanýyna sebep bolýy múmkin. 

Azamattyq qorǵanys qyzmeti jergilikti halyq pen týrısterge evakýatsııaǵa daıyn bolýdy eskertti.

Grekııanyń azamattyq qorǵanys basqarmasy eldiń on aımaǵynda eń joǵarǵy deńgeıdegi órt qaýpin jarııalady.

Afınadaǵy Ulttyq observatorııa dereginshe, orman órtteriniń saldarynan búkil el boıynsha 10 myń gektardan astam jer janyp ketken.

Grekııa Eýropalyq odaqtyń azamattyq qorǵaý tetigine kómek surap júgindi. Bıylǵy órt maýsymynda bul mehanızm 16 ret iske qosyldy. Buǵan deıin Ispanııa, Bolgarııa, Albanııa jáne Chernogorııa da kómek suraǵan. EO elderi – Frantsııa, Shvetsııa, Chehııa jáne Slovakııa órt sóndirýge qoldaý kórsetken.

Mamandardyń aıtýynsha, bıyl Eýropa elderindegi órtten zardap shekken aýmaq kólemi uzaq merzimdi ortasha kórsetkishten áldeqaıda artyq.

Eske sala ketsek, buǵan deıin Túrkııada da orman órtterimen kúres júrip jatqany habarlanǵan edi.