Grekııada eń tómengi jalaqy 920 eýroǵa deıin ósedi

ASTANA. KAZINFORM – Grekııa úkimeti eń tómengi jalaqyny 2026 jylǵy 1 sáýirden bastap 920 eýroǵa deıin kóterý týraly sheshim qabyldady, dep habarlaıdy Euronews.

Bul týraly premer-mınıstr Kırıakos Mıtsotakıs mınıstrler kabınetiniń otyrysynda málimdedi. Qazirgi kezde eń tómengi jalaqy 880 eýrony quraıdy, jańa ózgeris boıynsha ol aıyna 40 eýroǵa ósedi.

Úkimettiń málimetinshe, jalaqynyń ósýi jeke sektordaǵy 575 myńnan astam qyzmetkerge tikeleı áser etedi. Sonymen qatar bul sheshim memlekettik sektordaǵy ústemaqylardyń, áleýmettik tólemderdiń jáne eń tómengi jalaqyǵa baılanysty basqa da tólemderdiń artýyna yqpal etedi.

Bılik 2027 jylǵa qaraı eń tómengi jalaqyny 950 eýroǵa deıin jetkizýdi josparlap otyr. Al 2028 jyldan bastap bul kórsetkish arnaıy formýla boıynsha – ekonomıkalyq ósim men ınflıatsııa deńgeıine qaraı qaıta esepteledi.

Sarapshylardyń aıtýynsha, sońǵy jyldary Grekııa ekonomıkasy daǵdarystan keıin birtindep qalpyna kelip jatyr. 2019 jyldan beri eń tómengi jalaqy shamamen 40 paıyzǵa ósken.

Soǵan qaramastan, elde ınflıatsııanyń joǵary bolýy turǵyndardyń naqty tabysynyń aıtarlyqtaı ósýine múmkindik bermeı otyr. Energetıkalyq daǵdarys pen halyqaralyq naryqtaǵy turaqsyzdyq sońǵy jyldary ómir súrý qunynyń qymbattaýyna áser etken.

Eurostat deregine sáıkes, 2024 jyly Eýroodaqtaǵy jan basyna shaqqandaǵy ortasha jyldyq tabys 21 582 eýrony quraǵan. Bul kórsetkish Lıýksembýrgte – 50 799 eýro, Danııada – 34 843 eýro, Avstrııada 33 210 eýro bolsa, eń tómengi deńgeı Bolgarııa, Rýmynııa jáne Majarstanda tirkelgen.

Grekııada jan basyna shaqqandaǵy ortasha jyldyq tabys shamamen 10 850 eýrony quraıdy.

Aıta keteıik, ótken jyldyń sońynda jumys kúshi tapshylyǵyna baılanysty Grekııanyń JІÓ ósimi toqyraǵany habarlanǵan bolatyn.