Google Translate aýdarma qyzmetine qazaq tili engiziledi

ASTANA. 7 jeltoqsan. QazAqparat - Búgin «KaR-Tel» kompanııasy (Beeline saýda belgisi) Google Translate aýdarma qyzmetine qazaq tilin engizýge baǵyttalǵan «Google Translate+Kazakh» jobasynyń seriktesine aınaldy. Joba QR Prezıdenti Ákimshiliginiń jetekshisi Kárim Másimovtiń basqarýymen, Google kompanııasynyń tehnıkalyq qoldaýymen, «Wikibilim» Qoǵamdyq qory men «Qazkontent» AQ qoldaýymen júzege asyrylmaqshy. Bul týraly «KaR-Tel» kompanııasynyń qoǵammen baılanys qyzmeti málimdedi.

Google Translate - mátin bóligin nemese veb-betti avtomatty túrde aýdarýǵa arnalǵan Google kompanııasynyń tegin veb-qyzmeti. Qazirgi kezde atalmysh qyzmet quramynda 64 til bar, biraq qazaq tili engizilmegen. Qazaq tilin Google Translate júıesine engizý úshin aǵylshyn, orys tilderinen qazaq tiline jáne atalǵan tilderge bizdiń tilimizden aýdarylǵan maqalalar sany belgili bir shekten asýy shart.

«Bizdiń qor memlekettik tildi, bilim berý, mádenıet jáne ınnovatsııalyq tehnologııalardy  qoldaýǵa baǵyttalǵan birqatar jobalardy júzege asyrýda. Búginde bıznes-kompanııalardyń da osy baǵytta jumys jasaı bastaǵany qýantarlyq jaǵdaı. Biraq Google Translate júıesine qazaq tilin engizý úshin  júıege málimetti úlken kólemde engizý qajet. Jobanyń tabysty iske asyrylýy oǵan qoǵam ókilderiniń keńinen jumyldyrylýyna baılanysty», - deıdi «Wikibilim» Qoǵamdyq qorynyń jetekshisi Raýan Kenjehanuly.

«Jahandyq onlaın-aýdarmaǵa qazaq tilin engizý boıynsha joba Internettegi qazaq tildi kontenttiń damýyna úlken serpin beretinine senimimiz mol. Seriktestiktiń aıasynda mobıldi Internet, sondaı-aq «Úıdegi Internet» qyzmetiniń abonentterine Google Translate qyzmetine tegin kirý múmkindigi beriledi. Beeline jáne «Wikibilim» saıttarynda atalmysh qyzmetke aýdarylatyn mátindi qalaı engizýge bolatyny týraly egjeı-tegjeıli nusqaýlar ornalastyrylǵan. Sonymen qatar, elimizdiń JOO-da jobany tanystyrý tusaýkeserleri ótkizilip keledi, osy is-sharalar arqasynda stýdentter aktsııanyń alǵashqy qatysýshylary bola alady», - dep atap ótti «KaR-Tel» JShS-nyń PR-menedjeri Anar Jumaǵulova.

Uıymdastyrýshylardyń atap ótýinshe, «Google Translate+Kazakh» jobasyna ústimizdegi jyldyń sáýir aıynda Beeline brendiniń Qazaqstanǵa kelgenine 7 jyl tolýyna oraı iske qosylǵan aýqymdy «Jeti ıgi is» bastamasynyń aıasynda qoldaý kórsetiledi. Elimizdiń árbir aımaǵynda kompanııa qyzmetkerleri, seriktester, yntaly abonentter kúshimen 6 aýqymdy áleýmettik joba júzege asty. Google Translate jahandyq onlaın-aýdarmashynyń «tilder otbasyna» qazaq tilin engizýge baǵyttalǵan áleýmettik jobany qoldaý árbir qazaqstandyq qatysa alatyn 7-shi ıgi is bolmaq.