Gonkong steıblkoındar naryǵyn ashpaq
ASTANA. KAZINFORM – 1 tamyzdan bastap Gonkongte steıblkoındar týraly zań kúshine enedi. Olarǵa osy kezdiń ózinde Qytaıdyń jetekshi IT-kompanııalary qyzyǵýshylyq tanytyp otyr, dep habarlaıdy China Daily.
Qytaıdyń qurlyqtyq bóliginen 40-tan astam tehnologııalyq jáne qarjylyq kompanııa fıat valıýtalarymen qamtamasyz etilgen steıblkoındardy shyǵarý úshin lıtsenzııa alýǵa ótinish berýge daıyndalyp jatyr. Alaıda Gonkongtiń retteýshi organy onnan artyq ruqsat bermeýdi kózdep otyr.
Elektrondyq kommertsııa naryǵyndaǵy jetekshi kompanııalardyń biri — JD.com óz tokenderin Gonkong dollaryna baılanǵan ózge de negizgi valıýtalardy shyǵarý úshin jergilikti qurylymy — Jingdong Coinlink Technology Hong Kong-ty paıdalanýdy josparlap otyr.
Kompanııanyń esepteýinshe, bul transshekaralyq aýdarymdar boıynsha shyǵyndardy 90 paıyzǵa deıin qysqartyp, esep aıyrysýlardy 10 sekýnd ishinde aıaqtaýǵa múmkindik beredi.
Úmitkerlerdiń qatarynda onlaın tólemder salasyndaǵy jahandyq kóshbasshylardyń biri — Ant Group-tyń enshiles uıymy Ant Digital Technologies te bar. Kompanııa qazirgi ýaqytta retteýshi organdarmen kelissózder júrgizip, blokcheın men steıblkoındar negizinde ǵalamdyq esep aıyrysý platformasyn ázirlep jatyr.
Kompanııa steıblkoındardyń dástúrli qarjy men tsıfrlyq aktıvter arasyndaǵy baılanystyrýshy býyn retinde joǵary naryqtyq áleýetke ıe ekenin atap ótýde. Ant tsıfrlyq saýda ekojúıesin qalyptastyryp, ozyq tehnologııalar negizinde ınnovatsııalyq qarjy quraldaryn ilgeriletýdi josparlap otyr.
Botong Analysys konsaltıngtik kompanııasynyń aǵa sarapshysy Van Penbonyń aıtýynsha, qytaılyq tehnologııalyq alyptardyń belsendiligi steıblkoındardyń transshekaralyq tólemder men jabdyqtaý tizbegin qarjylandyrýdaǵy bolashaq róline degen senimin kórsetedi.
Jańa zańnamaǵa sáıkes, lıtsenzııany tek iri, qarjylyq turǵydan turaqty, rezervter, kapıtal jáne sáıkestik talaptaryna (komplaenske) joǵary deńgeıde saı keletin kompanııalar ǵana ala alady. Bul zań tsıfrlyq aktıvtermen operatsııalardyń ashyqtyǵyn, senimdiligin jáne turaqtylyǵyn qamtamasyz etýge baǵyttalǵan.
Osyǵan deıin Ulttyq banktiń krıpto-karta jáne tsıfrlyq aktıvter boıynsha pılottyq jobalardy bastaǵany týraly jazdyq.