Golovkın Sondersti óz ornyna qoıdy

ASTANA. QazAqparat - Londonda Gennadıı Golovkın (37-0, 33 KO) men Saýl Alvarestiń (49-1-1, 34 KO) baspasóz máslıhaty ótti, dep habarlaıdy QazAqparat Sports.kz-qa silteme jasap.

Boksshylarǵa suraq qoıǵandardyń arasynda WBO-nyń orta salmaqtaǵy chempıony Bıllı Djo Sonders (24-0, 12 KO) boldy.

Sonders «Kaneloǵa»: «Jekpe-jek ótkizbeı Golovkınge WBC beldigin nege bere saldyń?», -dep yńǵaısyz saýal qoıdy. Aýdarmashy brıtandyqtyń sózderin aýdara bastaǵanda, ol sózin qaıta jalǵastyryp: «Men saǵan ózim-aq aýdaryp bere alamyn: sen qorqaqsyń!».

Gennadıı Golovkın brıtandyqty dereý óz ornyna qoıdy. «Sonders, sen kóp sóıleısiń! Sen promoýter emes, boksshysyń!», - dedi ol.

Eske salaıyq, Golovkın-Alvares jekpe-jegi 16 qyrkúıekte Las-Vegastaǵy «T-Mobile Arena»-da ótedi.