Golovkın Ronaldýǵa bokstyń qyr-syryn úıretti

NUR-SULTAN. QazAqparat – Qazaqstandyq kásipqoı boksshy Gennadıı Golovkın áıgili portýgalııalyq fýtbolshy Krıshtıaný Ronaldýǵa bokstyń qyr-syryn úıretti. Álemge áıgili sportshylardyń birlesken jattyǵýy túsirilgen vıdeoúzindini boksshy óz Instagram-paraqshasynda jarııalady, dep habarlaıdy QazAqparat tilshisi.

Buqaralyq aqparat quraldarynda taraǵan aqparatqa sáıkes, Gennadıı Golovkın paraqshasynda bólisken vıdeoúzindi DAZN kompanııasynyń derekti fılminen alynǵan. Derekti fılmniń basty keıipkerleri Gennadıı Golovkın men Krıshtıaný Ronaldý. DAZN kompanııasynyń osynaý jańa jobasy sporttyń túr-túrinde álemge aty tanylǵan sportshylardy biriktiredi.

Shaǵyn ǵana treılerde sportshylardyń birlesken jattyǵýy kórsetilgen. Áńgime barysynda Golovkın Ronaldýdan: «Boksshy bola alar ma ediń?», - dep suraıdy. «Olaı oılamaımyn», - deıdi fýtbolshy.

«Ómirdegi ortań minezińdi qalyptastyrady. Biz baı emes, qarapaıym adam bolyp dúnıe esigin ashtyq. Óz ómiriń úshin tynymsyz kúresýge týra keledi», - deıdi Krıshtıaný Ronaldý.