Golovkın: Olar meni dopıngke bes ret tekserdi

ASTANA. QazAqparat - Qazaqstandyq boksshy Gennadıı Golovkın (36-0, 33 KO) Dúnıejúzilik dopıngke qarsy agenttik (VADA) uıymdastyrǵan dopıng-synamalarǵa qatysty pikirin bildirdi, dep habarlaıdy Sports.kz Boxingscene.com saıtyna silteme jasap.

«Árıne, barlyǵyna taza jaýynger ekenimdi kórsetkim keledi. Boks sporttyń taza túri bolýy tıis. Olar meni bes ret tekserdi. Menińshe, árbir boksshy osylaı jasaýy tıis. Alǵa, jigitter!», - dedi Golovkın.

Eske salaıyq, 18 naýryz kúni Nıý-Iorktiń Madison Square Garden arenasynda Golovkın amerıkalyq boksshy Denıel Djeıkobsqa qarsy jekpe-jek ótkizedi. Qazaqstandyq telearnalar aıqasty tikeleı efırden  kórsetedi. 

Qazaqstandyq sportshy budan keıingi kezdesýin Qazaqstanda ótkizgisi keletindigin aıtqan bolatyn. «Jekpe-jekti úıge alyp kelgim keledi, sebebi, ony árqaısysy óz kózimen kórýdi qalaıdy, tarıh úshin. Bul keremet qoı, adamdar muny sezingisi keledi. Men óz halqymdy qatty qurmetteımin. Olar meni udaıy qoldap otyrady, bul óte mańyzdy», - dep atap ótti Golovkın.

Biraq jekpe-jektiń boljaldy ýaqyty men GGG yqtımal qarsylasy týraly ázirge aıtylmaýda. Keıbir BAQ-tar bul kezdesýde Golovkınniń qarsylasy WBO belbeýiniń ıegeri brıtandyq Bıllı Djo Sonders (24-0, 12 KO) bolýy múmkindigin jazǵan edi.

Buǵan deıin habarlaǵanymyzdaı, «Astana EKSPO-2017» Ulttyq kompanııasynyń tóraǵasy Ahmetjan Esimov QR eńbek sińirgen sport sheberi Gennadıı Golovkınmen kezdesip, onymen EKSPO-2017 kórmesine oraı boks-ıvent ótkizý múmkindigin talqylady . Keıin bul máseleni Mádenıet jáne sport mınıstri Arystanbek Muhamedıuly da kótergen edi .