Golovkın kimmen bokstasatynyn ózi sheshedi- Abel Sanches

ASTANA. QazAqparat - Qazaqstandyq orta salmaqtaǵy boksshysy Gennadıı Golovkınniń jattyqtyrýshysy Abel Sanches Dúnıejúzilik boks keńesi men ózge uıymdar burynǵy chempıonǵa óz talaptaryn qoıa almaıtyndyǵy týraly aıtty, dep jazady Sports.kz.

Buǵan deıin WBC Golovkınge álemniń «ýaqytsha» chempıony Djermall Charlomen jekpe-jekti sanktsııalaǵan bolatyn. Bul aıqastyń jeńimpazy Saýl «Kanelo» Alvarestiń tolyqqandy chempıondyq beldigine mindetti úmitker bolýy tıis edi.

«Biz Gennadııdiń múddesi úshin ne mańyzdy ekenin eskerip otyrmyz. Golovkınniń kimmen judyryqtasatynyn eshkim, eshqandaı uıym anyqtamaıdy. Ol baǵytyn tańdaǵan kezde, kimmen bokstasatynyn ózi sheshetin bolady.GGG sheshim qabyldap, baspasóz paraqshasyn shyǵarǵan kezde ǵana keńes quramyz», - dedi Sanches Worldboxingnews.net-ke bergen suhbatynda.

Eske sala keteıik, qazirgi kezde Golovkın áleýetti teleseriktesterimen sońǵy kelissózderin júrgizý ústinde. GGG-diń rıngke sáýir nemese mamyr aılarynda oralatyny kútilip otyr, onyń qarsylasy kim bolatyny ázirge belgisiz.