Gımnasttar Antalıada eki medal jeńip aldy

ASTANA. KAZINFORM – Túrkııanyń Antalıa qalasynda ótken sporttyq gımnastıkadan Challenge Cup sanatyndaǵy týrnırde qazaqstandyq sportshylar eki medal jeńip aldy.

Sportty damytý dırektsııasynyń baspasóz qyzmeti málim etkendeı, bul jarysta Ulttyq qurama sportshylary 2 júldege ıe boldy.

Naqtyraq aıtsaq, at snarıadynda Narıman Kýrbanov kúmis júldeger atandy (14.850 upaı). Qazaqstandyq sportshy 1-oryn alǵan Ahmad Ábý ál-Saýdtan (14.900) nebári 0, 050 ball qalyp ketti.

Osy synda óner kórsetken Ulttyq quramanyń taǵy bir ókili Zeınolla Ydyrysov júldege bir taban jetpeı toqtady. Ol qola júldeger ýkraınalyq atletpen (Rodomır Stelmah) birdeı upaı jınaǵan (14.000). Alaıda baǵdarlamanyń qıyndyǵy jaǵynan qarsylasy basymdyqqa ıe boldy.

Osydan keıin Asan Salımov tirenip sekirý jattyǵýynda altynnan alqa taqty. Ol fınalda 14.300 upaı jınap, Ýkraına quramasynyń 2 gımnastynan edáýir ozyp ketti.