Ǵylymdy basqarýda áli de bıýrokratııa bar — senator

ASTANA. KAZINFORM — Senat depýtaty Ǵalıasqar Sarybaev otandyq ǵalymdy qoldaý men ǵalymdardyń máselesin qozǵady.

— Búginde ǵylym salasyndaǵy kemshilikterdi ózderińiz bilesizder, jas ǵalymdardyń jetispeýshiligi, ıaǵnı jas ǵalymdardyń shetelge ketýi. Oǵan sebep tómen jalaqy, basqa da áleýmettik máseleler. Ekinshiden, ǵylymı zertteýler kóp, biraq olar ónerkásipte qoldanylmaı jatady, sol sııaqty jeke sektorlar men ǵylymı ortalyq arasynda baılanystyń joqtyǵy. Kýrchatov qalasyndaǵy ıadrolyq fızıka ınstıtýtyn alatyn bolsaq, ol jerde búkil tsıkl bar, tek jalǵastyrý kerek. Sonda ǵana ǵylym aldyǵa jyljıdy, — dedi Ǵalıasqar Sarybaev Senat qabyrǵasynda ótken ǵylym qalashyqtaryn damytý máselelerine arnalǵan otyrysta. 

Odan ári senator qazaqstandyq ǵalymdardyń jarııalanymdaryna toqtaldy. 

— Halyqaralyq ǵylymı jýrnaldardaǵy jarııalanymdar óte úlken problema, jarııalanymdar shyǵady, biraq biz olardy oqı almaımyz. Sondyqtan jas ǵalymdardy qorǵaý kerek. Ǵylymdy basqarýda áli de bolsa bıýrokratııa bar, sony joıý kerek. Aqsha bólinedi, onyń ashyqtyǵy joq, qomaqty qarjydan bir-eki ǵylymı joba jasaıdy, biraq ol ónerkásipke endi ma ony eshkim bilip jatqan joq, — deıdi ol.

Aıta keteıik, búgin Senattyń Halyqaralyq qatynastar, qorǵanys jáne qaýipsizdik komıtetinde Kýrchatov qalasyn ǵylymı ortalyqqa aınaldyrý máseleleri qaraldy.