Germanııada tegin azyq-túlik taratatyn pýnktterge keletinderdiń 30 paıyzy – balalar

ASTANA. KAZINFORM - Germanııada tegin azyq-túlik taratatyn pýnktterdiń qyzmetin paıdalanatyndardyń shamamen 30 paıyzy – balalar. Bul týraly Tafel Deutschland volonterlik uıymynyń derekterine súıenip DW habarlady.

Qazirgi ýaqytta Germanııa aýmaǵynda Tafel Deutschland uıymyna qarasty 970-ten astam tegin azyq-túlik taratý pýnkti jumys isteıdi. Olardyń qyzmetin shamamen 1,5 mln adam paıdalanyp otyr. Uıym basshysy Andreas Shteppýnnyń aıtýynsha, kelýshilerdiń 20 paıyzy 63 jastan asqan azamattar bolsa, 30 paıyzǵa jýyǵy 18 jasqa tolmaǵandar.

– Ótken jylmen salystyrǵanda balalar sanynyń azdap artqany bizdi alańdatady, – dedi ol.

Uıym ókilderiniń málimetinshe, Germanııada jaldaý aqysynyń jáne azyq-túlik baǵasynyń ósýi kóptegen otbasylardyń aı saıynǵy tabysyn azaıtyp otyr. Sonyń saldarynan tegin azyq-túlik pýnktteriniń shamamen úshten birinde kezek kútý tizimderi saqtalǵan nemese jańa klıentterdi qabyldaý ýaqytsha toqtatylǵan.

Sonymen qatar tegin taratylatyn azyq-túlik kólemi de azaıyp barady. Tafel Deutschland dereginshe, 2025 jyly elde shamamen 265 myń tonna taǵam qaldyqtary joıylýdan saqtalǵan.

Alaıda bólshek saýda jelilerinen artyq ónim alý barǵan saıyn qıyndap keledi. Uıym bul úrdisti iri saýda jelileriniń jasandy ıntellektini keńinen qoldanýymen baılanystyrady. Nátıjesinde artyq qalǵan azyq-túlik kólemi azaıǵan.

2025 jyly tegin azyq-túlik taratý pýnktterinde barlyǵy 77 myńǵa jýyq adam jumys istegen, onyń ishinde 72 myńy – eriktiler. Bul kórsetkish ótken jylmen salystyrǵanda sál artqanymen, uıym basshysy kadr tapshylyǵy máselesi áli de ózekti ekenin atap ótti.

Andreas Shteppýnnyń aıtýynsha, bolashaqta azyq-túlik qaldyqtaryn azaıtý jáne qaıyrymdylyqty yntalandyrý úshin, ónimdi sadaqaǵa berý ony joıýdan arzan bolýyn qamtamasyz etetin zań qabyldaý qajet.

Aıta keteıik, Germanııada ortasha jalaqy ósti, biraq óńirlik aıyrmashylyq 30%-ǵa jetti.