Germanııada koronavırýs juqtyrǵan alǵashqy adam tirkeldi
BRıÝSSELЬ. QazAqparat – Germanııada jańa koronavırýs túrin juqtyrǵan alǵashqy adam tirkeldi. Bul týraly Bavarııa Densaýlyq saqtaý mınıstrligi dúısenbi kúni keshke málimdedi, dep habarlaıdy QazAqparat HAA menshikti tilshisi DPA agenttigine silteme jasap.
Naýqas er azamat - Mıýnhennen ońtústik-batysqa qaraı shamamen 30 kılometr jerdegi Bavarııa federaldyq jerindegi Shtarnberg qalasynan.
«Ol medıtsına qyzmetkerleriniń baqylaýynda jáne oqshaýlandyrylǵan», - delingen málimdemede.
Bavarııa Densaýlyq saqtaý mınıstrliginiń ókili turǵyndar arasynda aýrýdy juqtyryp alý qaýpi tómendigin málim etti.
Naýqaspen tyǵyz baılanysta bolǵandardyń barlyǵyna aýrýdyń belgileri, jeke gıgıena sharaly men vırýstyń qalaı taralatyny týraly aqparat berildi.
Sondaı-aq, koronavırýs juqtyrǵandar Ońtústik Koreıa, Taıvan, Taıland, Nepal, Vetnam, Saýd Arabııasy, Sıngapýr, AQSh, Frantsııa jáne Avstralııada tirkelgen.
Avtor:
Tımýr Dıýsekeev
