Germanııa JII-di damytýda serpilis jasaýdy josparlap otyr

ASTANA. KAZINFORM — Germanııa 2030 jylǵa qaraı jasandy ıntellekt el ekonomıkasynyń shamamen 10 paıyz tabysyn qamtamasyz etedi degen maqsat qoıyp otyr, dep habarlaıdy Kazinform agenttiginiń menshikti tilshisi.

Nemis ekonomısteri eldegi eńbek ónimdiligin arttyrý úshin jasandy ıntellektini jedel engizýge shaqyrýda. Osy maqsatta Germanııa 2027 jylǵa deıin Eýropalyq Odaqtyń qarjylandyrýymen jasandy ıntellekttiń gıgafabrıkalaryn salýdy kózdep otyr.

Eýropalyq komıssııa jasandy ıntellektke arnalǵan «gıgafabrıkalardy» salýǵa 20 mıllıard eýro kóleminde EO qarjy bóldi.

Eýroodaq qazirgi kezde álemde jasandy ıntellektini damytý boıynsha básekelestik kúsheıip kele jatqanyn atap ótti. Bul baǵytta Qytaı, AQSh jáne Úndistan kósh bastap tur. Germanııa men EO olardy qýyp jetýge talpynyp jatyr.

— Jasandy ıntellektini engizý arqyly biz 2030 jylǵa qaraı ekonomıkalyq óndirisimizdiń 10 paıyzyn osy tehnologııa negizinde qamtamasyz etýdi jáne jasandy ıntellektini negizgi zertteý salalaryndaǵy mańyzdy quralǵa aınaldyrýdy qalaımyz, — delingen Germanııanyń Zertteýler mınıstrliginiń strategııa jobasynda, ony Reuters agenttigi tanystyrdy.

Jobada Eýroodaq aýmaǵynda joǵary ónimdi derekterdi óńdeý ortalyqtaryn salýǵa ótinimder berilip, olardyń 2027 jylǵa qaraı paıdalanýǵa berilýi josparlanǵan. Germanııanyń federaldyq úkimeti osy ótinimderdi ónerkásip ókilderimen, sarapshylarmen jáne federaldyq jerlermen birlesip, jyl sońyna deıin úılestirmek.

Jyl basynda qabyldanǵan koalıtsııalyq kelisimge sáıkes, Germanııa úkimeti keminde bir osyndaı ortalyqty el aýmaǵynda salýǵa nıetti.

Nemis strategııasy sondaı-aq kvanttyq esepteýler salasyndaǵy batyl maqsattardy da qamtıdy: 2030 jylǵa deıin eki birdeı «qatelikterdi túzetýge qabiletti kvanttyq kompıýter» jasalyp, paıdalanýshylarǵa qoljetimdi bolýy kerek, delingen qujatta.

Úkimet bul strategııany osy aıdyń sońyna deıin bekitýdi josparlap otyr. Bul qujat AQSh pen Qytaıdy jasandy ıntellekt salasynda qýyp jetý úshin batyl maqsattar belgileıdi.

Sondaı-aq bıyl Germanııada kvanttyq baılanysqa arnalǵan alǵashqy zertteý spýtnıgin ushyrý josparlanǵan.

— Bul básekelik artyqshylyqtarmen qatar, táýeldilik te týdyrady, — delingen qujatta. 

Sonymen qatar Germanııadaǵy jasandy ıntellekt zertteýleri robototehnıka, mashına jasaý, avtomobıl óndirisi jáne hımııa ónerkásibi sııaqty salalarmen tyǵyz baılanysty bolýy tıis ekeni atap ótilgen.

Pentagonnyń da jasandy ıntellektini damytýǵa 200 mıllıon dollar bólgeni týraly osy jerden oqı alasyz.