Gazet tereń pikir almasý júretin alańǵa aınalyp kele jatyr – Erlan Qarın
ASTANA. KAZINFORM - «Egemen Qazaqstan» gazetinde «Tártip pen tazalyq – ulttyq ıdeologııanyń altyn dińgegi» degen materıal jarııalandy. Onda Memleket basshysy Qasym-Jomart Toqaevtyń tikeleı tapsyrmasymen qolǵa alynǵan aktsııa búginde jalpyhalyqtyq qoldaýǵa ıe bolǵany jáne tazalyqty tý etken, ósken jer, óngen ortany órkendetken ózekti bastama ekeni aıtylǵan. Vıtse-Prezıdent Erlan Qarın áleýmettik jelide jazba jarııalap, maqalanyń formaty erekshe ekenin atap ótti.
Maqalada spıkerler ishki saıasattyń, ulttyq ıdeologııanyń negizgi baǵyttaryn jan-jaqty talqylaǵan.
– «Egemen Qazaqstan» gazetiniń búgingi nómirinde «Tártip pen tazalyq – ulttyq ıdeologııanyń altyn dińgegi» degen materıal oqydym. Dál osyndaı úlgidegi maqalalardy buǵan deıingi sandarynan da kórgen edim. Bir taqyryp tóńireginde jan-jaqty talqylaý júrgiziledi. Formaty unady. Bul – el gazetiniń «Sanatker ult» dep atalatyn jobasy. Joba aıasynda ishki saıasattyń, ulttyq ıdeologııanyń negizgi baǵyttary jan-jaqty talqylanady. Osy jolǵy taqyryp Memleket basshysynyń «Taza Qazaqstan» bastamasyna arnalǵan. Spıkerler máselege ár qyrynan úńilipti. Jaqsy oılar aıtylǵan. Máselen, Prezıdent keńesshisi Baýyrjan Omarov «Taza Qazaqstannyń» bes qyryna toqtalyp, besinshi qyry retinde sanany tazartýdy atapty. ıAǵnı, oıdyń tazalyǵyn saqtaý. «Teginde muny besinshi qatarǵa emes, báriniń aldyna, ıaǵnı birinshi qatarǵa qoısaq ta bolar. Sana tazarsa, barlyq nárse tazarady. Tazarý jańarýǵa, jańarý jańǵyrýǵa bastaıdy», deıdi ol. Qazaqstan Halyq Keńesiniń múshesi Edil Jańbyrshın: «Memleket basshysy Qasym-Jomart Toqaev «Taza Qazaqstan» uǵymy ár adamnyń óz úıinen, aýlasynan, kóshesinen, aýylynan, qalasynan bastalatynyn únemi aıtyp keledi. Sana tazarǵanda ǵana biz osynaý aýqymdy túsiniktiń astaryna tereńdeı úńile alamyz», depti. Quryltaı depýtaty Serik Egizbaevtyń pikirinshe, Prezıdentimiz bastap bergen jalpyulttyq ıdeologııa árbir úıdiń, árbir azamattyń kúndelikti ómir saltyna aınalýǵa tıis. Al Quryltaı depýtaty Irına Ten «Tazalyq taza jerde emes, tazalyq saqtalǵan jerde bolady» degen túıindi oı aıtqan. Ári qoqys jınaıtyn adamdardyń sanyn kóbeıtýden góri, qoqys tastamaıtyn býyn qalyptastyrýǵa kóbirek kúsh salýymyz kerek ekenin alǵa tartady. Talqylaýǵa qatysqan basqa da spıkerler kóńilge qonymdy oı-pikir bildirgen, - dedi Erlan Qarın.
Sonymen qatar dóńgelek ústel formatyndaǵy mundaı materıaldar oqyrman qaýym úshin mańyzdy ekenin atap ótti.
– «Sanatker ult» jobasy aıasynda osyǵan deıin ýrbanızatsııa dáýirindegi ádebıet, tarıhı optımızm taqyryptary da talqylanǵanyn oqyǵan edim. Bizge dóńgelek ústel formatyndaǵy mundaı materıaldar kerek. Talqylaý kezinde barlyq taraptyń ókilderin qamtý da mańyzdy. Bul oqyrman úshin de úlken olja dep esepteımin. Osy joba arqyly «Egemen Qazaqstan» gazeti tyń oılar aıtylatyn, tereń pikir almasýlar júretin alańǵa aınalyp kele jatqanyn baıqatty, - dedi Vıtse-Prezıdent.
Maqalanyń tolyq nusqasyn myna silteme arqyly oqı alasyz.
