Garvardta qansha qazaqstandyq bilim alyp júr

ASTANA. KAZINFORM – Qazaqstannyń Ǵylym jáne joǵary bilim mınıstrligi Garvardty sheteldik stýdentterdi oqytý quqyǵynan aıyrý týraly sheshimge pikir bildirdi. 

– Garvard ýnıversıtetine qatysty bizge saýaldar túsip jatyr. Biz tek myna aqparatpen bólise alamyz: búgingi tańda «Bolashaq» baǵdarlamasy boıynsha Garvardta 7 adam bilim alýda. Basqa baǵdarlamalar nemese óz qarajatyna oqyp jatqan stýdentter týraly málimet bizde joq. Mundaı jaǵdaılar boıynsha tıisti suraýlar joldanady, - dep jazdy mınıstrliktiń resmı ókili Oljas Berkinbaev Facebook jelisinde. 

Eske sala ketsek, Tramp ákimshiligi Garvardty sheteldik stýdentterdi oqytý quqyǵynan aıyrdy. Ýnıversıtet endi stýdenttik vıza alýǵa qajetti qujattardy bere almaıdy. Qazirdiń ózinde oqyp jatqan sheteldikter basqa ýnıversıtetterge aýysýǵa májbúr bolady, áıtpese olar deportatsııaǵa ushyraıdy. 

Garvard bul sheshimdi zańsyz dep atap, halyqaralyq stýdentter ýnıversıtet pen eldi baıytady dep málimdedi. Qazirgi ýaqytta ýnıversıtette 7 myńǵa jýyq shetel azamaty bilim alyr jatyr – bul stýdentterdiń jalpy sanynyń tórtten birin quraıdy.

AQSh Garvard-qa bólinetin 2,2 mıllıard dollar memlekettik qarjylandyrýdy toqtatty. Bul úshin Garvard ýnıversıteti Tramp ákimshiligin sotqa berdi. 

Buǵan deıin Garvard kitaphanasy men arhıvi qazaq ǵalymdaryna qoljetimdi bolǵanyn, Garvard mamandary Qazaqstannyń sırek qoljazbalaryn tsıfrlandyratynyn jazǵan edik.