Ǵalymdar bal quramyndaǵy jasandy qospalardy anyqtady
ASTANA. KAZINFORM – Shvetsııa dúkenderindegi ımporttyq baldyń kóbi taza bolmaı shyqqan.
AZƏRTAC habarlaýynsha, muny ara ósirýshilerdiń salalyq uıymy júrgizgen zertteý nátıjeleri kórsetti.
Importtalǵan baldyń 36 úlgisin taldaý barysynda barlyq jaǵdaıda ónim quramynda tabıǵı baldyń az ǵana mólsheri bolǵany anyqtalǵan. Qalǵan bóligi túrli qospalardan, sonyń ishinde Azııadaǵy kúrish óndirisimen baılanysty sıroptan turǵan. Uıym tóraǵasy Ingve Kılberg arzan ımport, ásirese Qytaı ónimderi naryqqa qysym jasap, shved óndirýshileriniń jaǵdaıyn qıyndatyp otyrǵanyn aıtty.
Málimetke sáıkes, buǵan deıin mundaı qoldan jasalǵan ónimderdi anyqtaý qıyn bolǵan. Alaıda jańa DNQ tehnologııasynyń paıda bolýymen jaǵdaı ózgergen. Estonia zerthanasynda ázirlenip, qoldanylyp jatqan ádis ónim quramyn dál anyqtap, adal emes óndirýshilerdi áshkereleýge múmkindik beredi.
— Bal shyn máninde tiri aǵzaǵa uqsaıdy jáne onyń quramynda ósimdikterdiń, jándikterdiń, bakterııalardyń, sańyraýqulaqtardyń, tipti adam men úı janýarlarynyń DNQ-sy bolady. Mundaı quramdy sıroppen qoldan jasaý múmkin emes, — dep túsindirdi molekýlalyq dıagnostıka professory Kaarel Krıýtskov.
Ingve Kılbergtiń pikirinshe, sertıfıkattalǵan DNQ ádisin engizý jalǵan ónimdermen kúreste úlken serpilis bolýy múmkin. Ol shved bıligi bul tehnologııany qoldana bastaıdy dep úmittenedi.
Aıta ketelik Qazaqstanda ara sharýashylyǵyn qalaı damytýǵa bolatyny týraly jazǵan edik.
