Atyraýdaǵy 3 jaǵajaıdy shomylý maýsymyna daıyndaýǵa 91 mln teńge bólindi
ATYRAÝ.KAZINFORM – Ótken jyly Atyraýdaǵy jaǵajaılar sýǵa túsý maýsymyna daıyn bolmaı, turǵyndar aptap ystyqta qaıda bararyn bilmeı del-sal bolǵan edi.
Qala bıligi senimgerlik basqarýǵa berilgen 3 jaǵajaı boıynsha kelisimdi buzǵan. Óıtkeni, ýaqytsha ıelikke alǵan keıbir kásipkerler tarapynan tıisti ınvestıtsııa tartylyp, jaǵajaı ınfraqurylymyn damytý boıynsha naqty jobalar júzege asyrylmaǵan.
Atyraý qalasy ákimdiginiń málimetinshe, 2026 jylǵy sýǵa túsý maýsymyna jalpy sany 7 jaǵajaı daıyndalyp jatyr. Onyń ishinde 3 jaǵajaı qala aýmaǵynda ornalassa, 4 jaǵajaı aýyldyq okrýgterge tıesili.
Kásipkerlerdiń nemkettiginen aýyzdary kúıgen sheneýnikter endi jaǵajaıdy kútip ustaý jumysyn ózderi júrgizbek. Atyraý qalalyq turǵyn úı kommýnaldyq sharýashylyǵy jáne turǵyn úı ınspektsııasy qala ishindegi 3 jaǵajaıdy maýsymǵa daıyndaý úshin 91 mln teńge qarastyryp, tender jarııalap qoıǵan. Degenmen olardyń arasynda ortalyq sport kesheniniń mańyndaǵy jaǵajaı joq. Óıtkeni, endi ol aýmaq jaǵajaı retinde ashylmaıdy. Tasqyn kezinde jer bederi ózgerip, tik jar paıda bolǵan. Sondyqtan tótenshe jaǵdaılar departamenti ol jerdi jaǵajaı retinde paıdalanýǵa jaramsyz dep tapqan.
Merdiger mekeme jumysty kelisimshart jasalǵannan keıin 3 aı ishinde oryndaýy tıis. Talap boıynsha kásipkerge Balyqshy, Geolog jáne Jılgorodok (Malıbý) yqshamaýdanyndaǵy jaǵajaılardy abattandyrý jáne jaıly demalys aımaqtaryn qalyptastyrý maqsatynda birqatar keshendi jumys mindettelip otyr.
- Barlyq jaǵajaıda aýmaqty jaryqtandyrý júıesi ornatylady, onyń ishinde bolat tirekter, 300 Vt qýatty projektorlar jáne shamamen 100 metr elektr jelisi qarastyrylǵan. Jaǵajaı aýmaqtaryna qum tóseý jáne josparlaý jumystary júrgiziledi: Balyqshy men Geologta shamamen 3000 m², al Jılgorodokta 2800 m² aýmaq qamtylady. Sonymen qatar, Jılgorodok jaǵajaıynda qosymsha 560 m³ qum-qıyrshyq tas qospasy paıdalanylady,-delingen tehnıkalyq talapta.
Atalǵan aýmaqtaǵy jaǵajaılarda demalys ınfraqurylymy retinde MAF elementteri ornatylady. Olardyń qatarynda konteınerler, metall oryndyqtar, kóleńkeli shatyrlar, aqparattyq stendter bar. Ár jaǵajaıda keminde 30 shezlong jáne 10–15 kóleńkeli shatyr bolýy tıis.
Aıta keteıik, búginde bul memlekettik satyp alý konkýrsy Atyraý oblysy boıynsha ishki memlekettik aýdıt departamentiniń habarlamasyna sáıkes toqtatylǵan. Qaıtadan jańa konkýrs jarııalaý jumystary júrgizilip jatyr.
Qalalyq ákimdiktiń baspasóz qyzmetiniń málimetinshe, tender qunynda ózgeris bolmaıdy.
Daıyndyq jumystary tolyq aıaqtalyp, jaǵajaılar resmı túrde ashylǵannan keıin, olardy ári qaraı kútip-ustaý jáne basqarý fýnktsııalary qalalyq kásipkerlik jáne aýyl sharýashylyǵy bólimine qarasty «Bıznes jáne týrızm ortalyǵy» kommýnaldyq memlekettik mekemesine beriledi.
- Al aýyldyq okrýgterge qarasty 4 jaǵajaıdyń daıyndyǵyna sol okrýgterdiń ákimdikteri jaýapty. Olar da óz kezeginde qajetti jumystardy júrgizý úshin bólek tenderlik rásimder uıymdastyrady,-dep málimdedi ákimdiktiń baspasóz qyzmeti.
TJD málimetinshe, ótken jyly 2025 jylǵy shomylý maýsymynda qala aýmaǵynda qaza tapqandardyń sany 8 adamdy quraıdy, onyń ishinde bireýi - bala.
Buǵan deıin Atyraýda jasyl jelekter esepke alynbaǵanyn jáne dendrologııalyq jospar jasalmaǵanyn jazǵan edik.
