Fýtbolshy Danı Alves 4,5 jylǵa sottaldy
ASTANA. KAZINFORM – Bir jyl buryn ol jynystyq zorlyq-zombylyq jasady degen kúdikk ilingen. Keıin fýtbol klýby ortadaǵy kelisimshartty buzyp, al áıeli ajyrasýǵa aryz bergen. Bul týraly Reuters habarlady.
Ispanııa soty «Barselona» komandasynyń jáne Brazılııa quramasynyń burynǵy qorǵaýshysy Danı Alvesti 2022 jyly Barselonadaǵy túngi klýbta áıelge jynystyq zorlyq jasaǵany úshin kináli dep tapty.
Ataqty brazılııalyq fýtbolshysy tórt jarym jylǵa bas bostandyǵynan aıyryldy. Katalonııa Joǵarǵy sotynyń sheshimi boıynsha, Alves jábirlenýshige 150 myń eýro tóleýi tıis.
Danı bostandyqqa shyqqannan keıin de 5 jyl shartty jazasyn óteıdi.
Sot jábirlenýshiniń jynystyq qatynasqa kelisim bermegeni dáleldengenin, zorlaý jaǵdaıyn rastaıtyn basqa da dálelder bar ekenin aıtty.
Alves bastapqyda bul aıyptaýdy joqqa shyǵardy, biraq keıin munyń bári kelisimmen jasalǵanyn málimdedi.
Advokat ony aqtaýdy, prokýror oıynshyny toǵyz jylǵa bas bostandyǵynan aıyrýdy surady. Alves áli de úkimge shaǵymdana alady.
Tarıhtaǵy eń kóp marapattalǵan fýtbolshylardyń biri Alves 2023 jyldyń qańtarynda 23 jastaǵy áıeldiń ótinishi boıynsha tutqyndalyp, sodan beri túrmede otyr.
Áıel fýtbolshyny 2022 jyly 30 jeltoqsanda Barselonadaǵy Sutton klýbynyń VIP aımaǵynda tıiskenin aıtqan, dep jazdy El Periódico de Catalunya gazeti.
Áıeldiń aıtýynsha, Alves ony jýynatyn bólmege kúshtep kirgizip, zorlyqpen jynystyq qatynasqa túsirip, uryp-soǵyp, zorlaǵan.
Qylmystyq tergeý bastalǵan soń fýtbolshynyń áıeli Djoana Sans ajyrasýǵa aryz berip, jábirlenýshiniń aıǵaqtaryna senetinin málimdedi.
Danı Alves sońǵy onjyldyqtardaǵy eń tanymal brazılııalyq fýtbolshylardyń biri boldy. Ol óziniń mansabynyń kóp bóligin – toǵyz maýsymdy Barselonada ótkizdi. Alves Eýropada «Sevılıa» (2003-2008), «ıÝventýs» (2016-2017) jáne PSJ (2017-2019) komandalarynda da oınaǵan. Karerasynyń sońǵy bóliginde ol Brazılııanyń «San-Paýlý» komandasynda oınady (2019-2021), 2022 jyly meksıkalyq «UNAM Pumas» klýbynyń múshesi boldy, biraq oıynshy qamaýǵa alynǵannan keıin bul klýb kelisimshartty buzdy.
Alves óziniń mansabynda ártúrli klýbtarmen barlyǵy 46 júlde jeńip aldy jáne álemdegi eń kóp marapattalǵan oıynshy bolyp sanalady. Ol 2008-2016 jyldar aralyǵynda Barselonada alty ret La Lıga, úsh ret Chempıondar Lıgasy jáne tórt ret Ispanııa Kýbogy chempıony atandy.
