Fýtboldan ÁCh: Argentına alǵashqy oıynyn ótkizedi

ASTANA. QazAqparat - Qatarda ótip jatqan fýtboldan 2022 jylǵy álem chempıonatynyń úshinshi oıyn kúninde, 22 qarashada S tobynda eki kezdesý ótedi, dep habarlaıdy QazAqparat tilshisi.

Atalǵan topta Argentına, Saýd Arabııasy, Meksıka, Polsha quramalary synǵa túsedi.

S tobyndaǵy alǵashqy kezdesý Argentına men Saýd Arabııasy quramalary arasynda elorda ýaqytymen 16:00-de bastalyp, «Qazaqstan» jáne «Qazsport» telearnalarynan tikeleı efırde kórsetiledi.

Argentına quramasy álem chempıonatyna buǵan deıin 17 márte qatysty. 1978, 1986 jyldarda chempıon atansa, 1990, 2014 jyldary kúmis medal aldy.

Al Saýd Arabııasy bıyl dúbirli dodaǵa altynshy márte kelip otyr. 1994 jyly alǵash ret kelip, 1/8 fınalǵa deıin jetti.

Eki qurama buǵan deıin tórt márte kezdesti. Olardyń barlyǵy joldastyq kezdesý esebinde ótkizilgen. 1988 jyly 6 shildede 2:2, 2012 jyly 14 qarashada 0:0 esebimen teń tústi. Al Argentına 1988 jyly 16 shildede 3:1, 1992 jyly 20 qazanda 2:0 esebimen basym tústi.

Atalǵan toptaǵy Meksıka jáne Polsha kezdesý elorda ýaqytymen 22:00-de «Qazsport» telearnasynan tikeleı efırde kórsetiledi.

Bıyl álem chempıonatyna 18 márte qatysqaly otyrǵan Meksıka 1970, 1986 jyldarda jáne 1994-2018 jyldar aralyǵynda 1/8 fınalǵa deıin jetti.

Al Levandovskı bastaǵan Polsha quramasy bıyl álem chempıonatyna segizinshi márte aıaq basyp otyr. Olar 1974, 1982 jyldarda qola júldeger atandy.

Eki qurama buǵan deıin segiz márte kezdesti. Onyń 3-i Meksıka, 3-i Polshanyń basymdyǵymen, 2-i teń nátıjemen aıaqtaldy.

Búgin, 22 qarashada D tobyndaǵy Danııa - Týnıs, Frantsııa - Avstralııa quramalary kezdesedi.

Eske salsaq, budan buryn A tobynda Anglııa quramasy Irandy iri eseppen jeńse, Nıderlandy Senegaldan basym tústi.

Sondaı-aq, A tobyndaǵy eki oıynnyń nátıjesi belgili boldy.

Foto: gettyimages.com