Frantsııada taǵy bir mýzeı tonaldy

ASTANA. KAZINFORM – Frantsııanyń soltústigindegi Langr qalasynda ornalasqan «Denı Dıdro aǵartý úıinen» XVIII ǵasyrdaǵy altyn jáne kúmis monetalardyń shamamen 2000 danasy bir túnniń ishinde urlanyp ketti, dep habarlaıdy BILD basylymy.

Mamandardyń aıtýynsha, bul monetalardyń kópshiligi biregeı úlgilerge jatady. Aldyn ala derekter boıynsha, qylmyskerler áreketterin kásibı deńgeıde uıymdastyrǵan, ıaǵnı olar naqty neni izdegenin jaqsy bilgen.

Tergeýshiler sońǵy aılarda mundaı jaǵdaılar jıilep ketkenin aıtady. Qyrkúıek aıynyń basynan beri Frantsııadaǵy birneshe murajaı men kollektsııalar tonalǵan.

Qazan aıynyń ortasynda ońtústik-batystaǵy Sarran kommýnasynda ornalasqan Jak Shırak murajaıy eki táýlik ishinde eki ret tonalǵan. Urylar burynǵy prezıdent Jak Shırakqa berilgen dıplomatııalyq syılyqtar, zergerlik buıymdar men saǵattardy alyp ketken. Zalal mólsheri ázirge naqtylanǵan joq, polıtsııa tergeý júrgizip jatyr.

Buǵan deıin, qyrkúıek aıynda, Lımoj qalasyndaǵy Adrıen Dıýbýshe ulttyq murajaıynan jalpy quny 6,5 mıllıon eýro turatyn úsh qytaı farfor buıymy joǵalǵan. Bul jádigerler resmı túrde «ulttyq qazyna» mártebesine ıe bolǵan.

Birneshe kúnnen keıin Parıjdegi Tabıǵat tarıhy murajaıynan 1,5 mıllıon eýroǵa baǵalanǵan birneshe altyn kesegi urlandy. Bul iske qatysty 24 jastaǵy kúdikti Barselonada ustaldy, onyń sybaılastary Eýropa kóleminde izdestirilip jatyr.

Polıtsııa ázirge bul qylmystardyń bárin bir uıymdasqan top jasady ma, álde bul tek uqsas ádispen áreket etetin birneshe toptyń isi me – naqty aıta almaı otyr. Al Lývr murajaıyndaǵy urlyqqa qatysty tergeýshiler kásibı deńgeıde uıymdasqan qylmystyq toptyń qatysy bar dep boljaıdy.

Osyǵan deıin áıgili Lývr murajaıy tonalǵannan keıin qaıta ashylǵany týraly jazdyq.