Frantsııada ondaǵan Tesla elektromobıli órtenip ketti
ASTANA. KAZINFORM — Marsel mańyndaǵy Penn-Mırabo eldi mekeninde ornalasqan Tesla dılerlik ortalyǵynda aýqymdy órt bolyp, ondaǵan elektromobıl janyp ketti, dep habarlaıdy Euronews.
Shamamen 50-ge jýyq órt sóndirýshi túnimen tilsiz jaýmen arpalysyp, ottyń kórshi ǵımarattar men kólikterdi sharpýyna jol bermedi. Zardap shekkender joq.
Órttiń sebebi ázirge belgisiz. Polıtsııanyń málimetinshe, alańshanyń artqy jaǵyndaǵy qorshaý qıylǵan, bul qasaqana órt qoıý bolýy múmkin degen kúdik týdyrǵan.
Oqıǵa ornynda krımınalıster jumys istep, tergeýshiler qylmystyq is qozǵady. Óz kezeginde Tesla kompanııa ishinde tekseris júrgizetinin málimdedi.
Aıta keteıik, buǵan deıin Tesla aktsıonerleri kompanııa negizin qalaýshy Ilon Mask úshin quny 1 trln dollarǵa deıin jetýi múmkin rekordtyq ótemaqy paketin maquldaǵan. Shart boıynsha, álemdegi eń baı adam sanalatyn Mask aldaǵy jyldary elektromobıl óndirýshisiniń naryqtyq qunyn aıtarlyqtaı arttyryp, birneshe negizgi kórsetkishterdi oryndaýy tıis.
Buǵan qosa, buǵan deıin Tesla Maskqa keminde taǵy eki jyl kompanııada qalý shartymen 29 mlrd dollar kóleminde jańa bonýsty bekitti.