Florıda ýnıversıtetinde bolǵan atys: qazaqstandyq stýdentter din-aman
ASTANA. KAZINFORM — «Halyqaralyq baǵdarlamalar ortalyǵy» AQ-nyń Florıda shtaty ýnıversıteti kampýsynda bolǵan oqıǵaǵa baılanysty resmı málimdeme jasady.
2025 jylǵy 17 sáýirde Florıda shtaty ýnıversıtetiniń kampýsynda atys boldy. Sońǵy málimetter boıynsha, qaıǵyly oqıǵa saldarynan eki adam qaza taýyp, taǵy alty adam jaraqat aldy.
— Halyqaralyq baǵdarlamalar ortalyǵy jaǵdaıdy muqııat baqylaýda ustap otyr jáne osy ýnıversıtette bilim alyp jatqan qazaqstandyq stıpendıattarmen turaqty baılanysta. Búginde Florıda shtaty ýnıversıtetinde «Bolashaq» halyqaralyq stıpendııasy aıasynda 4 stıpendıat bilim alyp jatyr, onyń 3-eýi magıstratýra, 1-eýi doktorantýra baǵdarlamasy boıynsha. Barlyq stıpendıat aman-esen, jergilikti bılik organdarynyń nusqaýlaryn buljytpaı oryndap otyr. Biz stýdentterimizge der kezinde aqparat berip, qaýipsizdik sharalaryn saqtaǵandary úshin alǵys bildiremiz, — delingen habarlamada.
Aqparatta aıtylǵandaı, oqys oqıǵaǵa baılanysty ýnıversıtet oqý protsesi men is-sharalardy ýaqytsha toqtatty.
— AQSh aýmaǵynda júrgen barlyq stıpendıatqa saqtyq sharalaryn qatań saqtaýdy, sergek bolýdy jáne kúmán týdyratyn jaǵdaıda, dereý ortalyqpen baılanysqa shyǵýdy suraımyz, — dep habarlaıdy «Halyqaralyq baǵdarlamalar ortalyǵy» AQ.
Buǵan deıin AQSh-tyń Florıda shtaty ýnıversıtetinde bolǵan atys kezinde adamdardyń jaraqat alǵany týraly habarlaǵan edik. Beımálim adam Tallahassı qalasyndaǵy ýnıversıtet kampýsynda oq jaýdyrǵan.