EURO-2024: Búgin 1/2 fınalda Anglııa men Nıderland kezdesedi

ASTANA. KAZINFORM — Fýtboldan 2024 jylǵy Eýropa chempıonatynda búgin, 10 shildede 1/2 fınaldaǵy ekinshi oıynda Anglııa men Nıderland quramalary kezdesedi.

Kezdesý saǵat 00.00-de bastalyp, «Qazaqstan» telearnasynan tikeleı efırde kórsetiledi. Kezdesý Dortmýnd qalasyndaǵy «Sıgnal Idýna Park» stadıonynda ótedi.

S tobynda synǵa túsken Anglııa Serbııany 1:0 esebimen jeńse, Danııamen 1:1, Slovenııamen 0:0 esebimen teń oınady. Anglııalyq fýtbolshylar 1/8 fınalda Slovakııany qosymsha kezeńde 2:1 esebimen súrindirdi. 1/4 fınalda Shveıtsarııamen negizgi kezeńde 1:1 esebimen teń túsip, penaltıler serııasynda 5:3 esebimen jeńip ketti.

Nıderland D tobynda Polshany 2:1 esebimen jeńip, Aýstrııaǵa 2:3 esebimen ese jiberse, Frantsııamen 0:0 esebine qanaǵat bildirdi. 1/8 fınalda olar 3:0 esebimen Rýmynııanyń osal tusyn tapsa, shırek fınalda túrkııany 2:1 esebimen tize búktirdi.

Eki qurama buǵan deıin 22 márte kezdesip, 6-da Anglııa, 7-de Nıderland basym tússe, qalǵanynda teń nátıje tirkeldi.

Eske salsaq, budan buryn Ispanııa 12 jyldan keıin Eýropa chempıonatynyń fınalyna shyqty.