Eski elektr symdary kólik úshin qaýipti — qutqarýshy

QYZYLORDA. KAZINFORM — Qyzylorda  oblysy Aral aýdanynyń Aral qalasynda jeke turǵyn úı aýlasynda jeńil kólik órtendi.

Oblystyq tótenshe jaǵdaılar departamentiniń málimetinshe, órt kólikti jóndeý kezinde qozǵaltqysh bóliginen shyqqan. Sonyń saldarynan 3 adamdy túrli dárejedegi kúıik shaldy.
Mamandar avtokólikterdegi tilsiz jaýdyń basym kópshiligi qozǵaltqysh bóliginde elektr symdarynyń qysqasha tuıyqtalýynan bolatynyn aıtyp otyr.

— Kóptegen kólik ıesi temir tulparyn ýaqytyly tehnıkalyq baıqaýdan ótkizbeıdi. Eski elektr jelilerin teksertpeıdi. Osydan kep oqys jaǵdaı paıda bolyp, opyq jegizedi. Biz órttiń aldyn alý maqsatynda turaqty túrde profılaktıkalyq is-sharalar júrgizemiz. «Qaýipsiz avtokólik», «Órtten saq bol», «Biryńǵaı órt qaýipsizdigi kúni», «Gazballon» aktsııalary, sondaı-aq turǵyndardyń órt kezindegi bastapqy is-áreketterin pysyqtaýǵa, qaýipsizdik erejelerin nasıhattaýǵa baǵyttalǵan is-sharalar uıymdastyryldy, — dedi departamenttiń memlekettik órt baqylaý basqarmasynyń bastyǵy, azamattyq qorǵaý podpolkovnıgi Beıbithan Spanov.

Qutqarýshylar oblystyq polıtsııa departamenti jáne volonterlik uıym ókilderimen birge adam kóp júretin oryndar men nysandarda 50-den astam reıdtik is-shara ótkizip, 7 myńnan astam turǵynǵa qaýipsizdik talaptaryn túsindirdi.

Beıbithan Spanov osy oraıda avtokóliktegi órttiń aldyn alý jóninde keńes berdi. 

— Elektr symdarynyń bútindigin júıeli túrde tekserý kerek, sebebi aqaýly nemese eski elektr symdary qaýip tóndiredi. Otyn júıesin, ıaǵnı janarmaı qubyrlary men bak bóliginde aqaý bolmaýyn, maıdyń aǵyp ketpeýin qadaǵalaý, janarmaı quıý kezinde qozǵaltqyshty óshirý, kólikti ýaqytyly arnaıy tehnıkalyq tekserýden ótkizý, kólikte mindetti túrde jaramdy órt sóndirgish bolyp, ony qoldana bilý kerek. Turǵyndardy kólik ishinde temeki shekpeýge, ashyq ot paıdalanbaýǵa, qozǵaltqyshtan kúıik ıisi nemese tútin baıqalsa, birden toqtap, kólikti sóndirýge, órt nemese basqa da tótenshe jaǵdaı kezinde dereý 101 jáne 112 telefon nómirlerine qońyraý shalýǵa shaqyramyn, — dedi departament ókili.

Eske salsaq, Úkimet buǵan deıin kólikterdi tehnıkalyq baıqaýdan úsh jylda bir ret ótkizý týraly usynysqa jaýap bergen bolatyn.