Esirtkige elitetinder kóbeıdi
ASTANA. QazAqparat - Osydan tabany kúrekteı jıyrma jyl buryn jer betinde ósetin qaýipti shópti qushyrlana soratyndar kóp edi. Endi sıntetıkalyq esirtkige esi kete eligetinder shyqty.
Muny dáýir jańalyǵy deımiz be? Qalaı aıtsaq ta qoǵamda sanaǵa sımaıtyn jaıttar jıilep ketti.
«Osy bir sanany ýlap, mıdy keptiretin, onysymen qoımaı densaýlyqty búldiretin esirtkilik zattar nege ózge elden bizdiń elge kosmostyq jyldamdyqpen tasymaldanyp jatyr. Baqylaý joq pa? Quqyq qorǵaý organdary qaıda qarap otyr?». Bul jaqyndarynyń, týystarynyń, ul-qyzdarynyń esirtkiden ýlanyp, ólim qushqaly jatqanyn kórip, kózden jasyn aǵyzǵandardyń zary.
Qazaqstandy aıtpaǵanda bir ǵana Almaty qalasynda «spaıs» shegýge arnalǵan shóptik qospaǵa áýestengen jastar sany birnesheni qurap otyrǵan kórinedi. Al, tirkeýde turmaǵandary qanshama.
«Zańdy esirtkiler» men «dızaınerlik esirtkiler» retinde satylatyn jańa psıhologııalyq belsendi preparattardyń ashyqtan-ashyq ǵalamtordy jaılap alǵany jandy shoshyndyrady. Tipti, jarnamalary da birinen-biri ótedi. Tek, sol ǵalamtor betindegi telefon nómirin terseńiz jetip jatyr. Qalaǵan jerińizge ózderi jetkizip beredi. Baǵasy da anaý aıtqandaı qymbat emes. Keptirilgen shóp sııaqty, ıisi de jaǵymdy. Qyzyq úshin ony alǵash paıdalanǵan adam máńgi táýeldi bolyp qalǵanyn sezbeı de qalady. Sonymen, qoldanǵan adamdy eseńgiretip, «rahat ómirge» batyratyn joldamanyń quny bar-joǵy eki jarym myń teńgeden bastalady. Buǵan toıtarys berip jatqan jan joq. Aqshań bolsa, ǵalamtor arqyly tapsyrys berip, qumaryńnan shyǵa ber.
«Spaıs», «mıaý-mıaý», «vannaǵa arnalǵan tuz» sekildi kezbe ataýlarmen atalatyn preparattardyń qaýiptiligi dástúrli preparattarǵa qaraǵanda basym kórinedi. Alaıda, ony túsinip, boıyn aýlaq salyp jatqandar shamaly, kerisinshe, olardy qaýipsiz dep esepteıdi.
«Saqtansań - saqtaıdy» degen bar. Qalaı desek te, e si kirgenniń de, esi áli kirmegenniń de esin alǵan esirtki kesirli dertke aınaldy.
