Esirtki jarnamalaǵan 740 saıt buǵattaldy

NUR-SULTAN. QazAqparat – Sıntetıkalyq esirtki geroındi naryqtan yǵystyra bastaǵan. Bul týraly Іshki ister mınıstrligi Esirtki qylmysyna qarsy is-qımyl departamentiniń basqarma bastyǵy Baqytjan Ámirhanov aıtty, dep habarlaıdy QazAqparat tilshisi.

«Astanadaǵy psıhıkalyq densaýlyq ortalyǵy mamanynyń aqparaty boıynsha, búginde gerıonge táýeldi nashaqorlar sırek kezdesetin bolǵan. Qazir kóbine sıntetıkalyq esirtkige táýeldi naýqastar kóp túsedi. Onyń kóbi aýyr ári tereń psıhoz dertine jáne ortalyq júıke júıesiniń saldanýyna shaldyǵady», - deıdi maman.

Onyń aıtýynsha, mundaı esirtkini satýshylar ınternettiń áleýetin túgel paıdalanyp júr.

«Biz óz jumysymyzda esirtki jarnamasymen kúreske basymdyq berip otyrmyz. Zańnamadaǵy túzetýler boıynsha bul áreketter aýyr jáne asa aýyr qylmys túrine jatqyzylǵan, ómir boıy bas bostaǵandyǵynan aıyrýǵa deıin uzaq merzimdi jaza qarastyrylǵan.Bıyl 5 aıda esirtki saýdasymen baılanysty 105 sotqa deıingi tergeý tirkeldi. Onyń 56-sy jarnamamen, 49-i ınternet satýmen baılanysty», - dedi basqarma basshysy.

Sondaı-aq, ol zańnama arqyly 89 psıhıkalyq aktıvtiń zattyń ataýyn tıisti normalarǵa engizý arqyly belgili sıntetıkalyq esirtkiniń bárin quqyqtyq alańǵa shyǵarý múmkin bolǵanyn eske saldy.

«Osynyń arqasynda 2018-2020 jyldar aralyǵynda tárkilengen sıntetıkalyq esirtki kólemi ondaǵan ese artty. Úsh jyl buryn 5 keli tárkilense, 2020 jyly 96 keli tárkilendi. Jyl basynan beri ǵana 41 keli sıntetıkalyq esirtki tárkilenip, esirtkimen baılanysty 529 qylmys tirkeldi. Onyń ishinde 219 sıntetıkalyq ersitki satý, 48 saqtaý faktisi anyqtaldy. Esirtki jarnamasyn taratqan 740 saıt buǵattalyp, 10 zerthana jabyldy. Ol jerden 15 keliden astam daıyn esirtki, 35 lıtr qosalqy suıyqtyq tabyldy», - dedi Baqytjan Ámirhanov.