Ertis ózeninde seń júre bastady
PAVLODAR. KAZINFORM – Ertiste kóktemgi seń júrý bastaldy. Tótenshe jaǵdaılar qyzmetiniń mamandary muz kóshkinine baılanysty ózendegi sý deńgeıin táýlik boıy baqylaýǵa aldy. Ázirshe úlken muz keptelisteri baıqalmaıdy.
Tabıǵı qubylysty ózen jaǵalaýyndaǵy eldi mekenderdiń halqy qyzyǵa tamashalap jatyr.
– Kópjyldyq monıtorıng boıynsha bul tabıǵı qubylystyń qarqyndylyǵy jyl saıyn álsirep kele jatqanyn kórsetedi. Buǵan ártúrli faktorlar, sonyń ishinde temperatýra tártibi de áser etedi. Tipti uzyndyǵy 60-70 shaqyrym bolatyn ózen ýchaskesi qysta tolyǵymen qatpaıdy. Soǵan oraı Ertiste burynǵydaı úlken muz keptelisi baıqalmaıdy, - dep habarlady óńirlik tótenshe jaǵdaılar departamentinen.
Muz kóshý kezeńinde tótenshe jaǵdaı qyzmetkerleri táýliktik kezekshilik uıymdastyryp, Ertis ózenindegi sý deńgeıin úzdiksiz baqylaıtynyn málimdedi.
Ózendegi seń júrip ótken soń elimizdiń shyǵys óńirindegi sý qoımalarynan bosatylǵan mol sý Pavlodar aımaǵyna jetedi.
Buǵan deıin Ertis ózenine kóktemgi sý bosatý bastalǵanyn jazǵanbyz. Bıyl jalpy kólemi 6,3 km sý bosatylyp, ózen jaıylmalarynyń 90%-dan astamy sýǵa qanyǵady dep kútilip otyr.