BAQ: Iran munaı qoımalary tolyp ketpeýi úshin óndiristi qysqarta bastady
ASTANA. KAZINFORM — Iran AQSh-tyń teńiz blokadasy aıasynda munaı qoımalarynyń tolyp ketýine jol bermeý úshin munaı óndirý kólemin qysqartyp jatyr. Bul týraly Bloomberg agenttigi joǵary laýazymdy ırandyq sheneýnikke silteme jasap habarlady, dep Belta jazdy.
Ormýz buǵazyndaǵy amerıkalyq shekteýlerge baılanysty sońǵy aptalarda ıran munaıynyń eksporty kúrt tómendep, qoımalar tez tola bastaǵan.
Sonymen qatar jarııalanymda Vashıngton eskere bermeıtin mańyzdy jaıt atap ótiledi: Tegeran mundaı stsenarıılerge aldyn ala daıyndalý tájirıbesine ıe. Osyǵan baılanysty Iran bıligi munaı qoımalary tolyq tolýyn kútpeı-aq óndiristi kezeń-kezeńimen qysqartýǵa kirisken.
Irandyq ınjenerlerdiń tájirıbesi munaı uńǵymalaryn eleýli shyǵynsyz ýaqytsha toqtatyp, keıin óndiristi jedel qalpyna keltirýge múmkindik beredi.
Buǵan deıin Iran prezıdenti Masýd Pezeshkıan Tegerannyń aımaqtaǵy beıbitshilik pen turaqtylyqty qamtamasyz etetin ádil sheshimge qol jetkizý úshin dıplomatııalyq úderisti jalǵastyrýǵa daıyn ekenin málimdedi. Alaıda, onyń aıtýynsha, bul AQSh ustanymynyń ózgerýine baılanysty. Ol sondaı-aq ıran porttaryna qoıylǵan blokadany halyqaralyq quqyq normalaryna qaıshy ári qabyldaýǵa bolmaıtyn áreket dep atap ótti.
Aıta keteıik, AQSh Qarýly kúshteriniń Ortalyq qolbasshylyǵy 13 sáýirden bastap Iranǵa teńiz blokadasyn engizip, el porttaryna baǵyttalǵan jáne odan shyǵatyn barlyq kemeler qozǵalysyn shekteýge nıetti ekenin málimdegen.
Aıta keteıik, buǵan deıin munaı baǵasy AQSh pen Iran arasyndaǵy kelissózdiń ótkizilmeýine baılanysty kúrt óskenin jazdyq.
