Ertis boıyndaǵy muz ótkelderi qashan ashylady
PAVLODAR. KAZINFORM — Mamandardyń aıtýynsha, ózendegi muz qabaty qazirgi ýaqytta meılinshe juqa, tıisti normatıvke jetpegen. Avtokólikter júrýi úshin muz qabaty keminde 25 santımetr bolýy kerek.
Óńirlik tótenshe jaǵdaılar departamentiniń habarlaýynsha, Ertis ózeniniń Pavlodar oblysy bóliginde muz ótkelderi ázirshe ashylmaǵan. Qysqy ýaqytta ózen jaǵalaýyndaǵy aýyldarǵa jem-shóp pen otyn tasý úshin paıdalanylatyn muz joldary ádette 6 birdeı aýdanda jumys isteıdi. Aýdandar arasy jaqyndaı túsip, alys-beris artady.
— Іshki ister mınıstrliginiń 2015 jylǵy 19 qańtardaǵy № 34 buıryǵyna sáıkes, muzdyń qalyńdyǵy 25 santımetrden assa — avtokólikterdiń ótýine, 10 santımetrden assa — jaıaý adamnyń júrýine ruqsat beriledi. Anyqtaǵanymyzdaı, barlyq jerde muz qabaty belgilengen normatıvtik qalyńdyqqa jete qoımaǵan. Aýa temperatýrasynyń turaqty túrde tómendeýi jáne sý aıdyndarynda muz qatý protsesiniń ári qaraı jalǵasýyna baılanysty óńirde muz ótkelderin kezeń-kezeńimen ashý josparlanǵan. Departament jergilikti atqarýshy organdarmen birlesip muz ótkelderin uıymdastyrý jáne ashý úshin oryndardy aıqyndaıtyn bolady. Ázirshe bul múmkin emes, - dep málimdedi Kazinform tilshisine departamentten.
2024–2025 jylǵy qysqy kezeńinde oblys aýmaǵynda 13 muz ótkeli jumys istegen. Onyń 8-i avtokólikter úshin, ózgesi jaıaý júrginshiler men júk kólikterine arnalǵan.
Atap aıtqanda, Maı aýdanynda — 2, Aqqýlyda — 1, Tereńkólde — 4, Ertiste — 1, Jelezınde — 4, Pavlodar aýdanynda — 1 ótkel ashyq bolǵan.
Árbir muz ótkelin ashý ýákiletti mekemelerdiń muz qalyńdyǵyn ólsheý, tekserý jumystaryn júrgizip, tıisti ruqsatyn alǵannan keıin ǵana júzege asyrylady. Resmı túrde ashylǵanǵa deıin atalǵan jerlerde muz ústine shyǵýǵa qatań tyıym salynady.
Mınıstrlik bekitken arnaıy buıryqta ótkelderden túsetin jerlerde eki jaqtan da ornatylǵan qalqandarda arnaıy qysqy qural-jabdyqtar (ilgekter, satylar, qutqarý sheńberleri, bóreneler) qoıylýy kerektigi eskertilgen. Buǵan qosa kireberisterde ótkeldiń ataýy, jumys ýaqyty jáne ony qurý men ustaýǵa jaýaptylardyń derekteri kórsetilgen mańdaıshalar ornatylady. Sondyqtan barlyǵy talapqa saı bolmasa, muh ótkelderi ashylmaıtynyn eskerý kerek. Bul jumystarǵa jergilikti atqarýshy organdar jaýapty.
Qutqarý qyzmetteri turǵyndarǵa muz ótkelderiniń ashylý merzimi aýa raıy jaǵdaıyna jáne muzdyń qalyptasý qarqynyna tikeleı baılanysty ekenin eskertedi. Kereký óńirinde jeltoqsan aıynda qatty aıazdar bola qoıǵan joq. Qańtar aıazdy bolsa, Ertis ózeniniń muzy qalyńdap, ótkeldermen jolaýshylardyń arly-berli zyrlaýyna múmkindik týady.
2024 jyly Pavlodar oblysynda muz ótkelderi qańtar aıynan ashylǵany týraly jazǵanbyz.
Al, ótken qysta Pavlodar oblysynda ashylǵan 5 muz ótkeli qutqarý quraldarymen tıisinshe jaraqtalmaǵany belgili bolǵan.