Ertis boıyna kóktem qashan keledi

PAVLODAR. KAZINFORM - Aýa raıyn boljaýshylardyń málimetinshe, naýryz aıynda kún raıy qubylmaly bolady. Óńir turǵyndary kóktemniń naǵyz shýaǵyn aıdyń ortasyna qaraı sezine alady.

«Qazgıdromet» RMK óńirlik fılıaly naýryz aıynda ortasha aýa temperatýrasy normadan bir gradýsqa joǵary bolatynyn habarlady. Aıdyń basynda aýa temperatýrasy túnde -8… -13°S-qa deıin, kúndiz -3… +2°S-qa deıin kóteriledi dep kútilip otyr. Odan keıin túnde -19… -24°S-qa deıin, kúndiz -7… -12°S-qa deıin tómendeıdi dep boljanady

- Ekinshi onkúndikte aýa temperatýrasynyń birtindep kóterilýi kútiledi: túnde −3… +2 °C-qa deıin, kúndiz +7… +12 °C-qa deıin, oblystyń ońtústiginde +15 °C-qa deıin. Sońǵy onkúndikte temperatýra jıi aýytqıdy: túnde −3… +2 °C-tan −8… −13 °C-qa deıin (oblystyń ońtústiginde −5 °C-qa deıin), kúndiz +7… +12 °C-tan (ońtústikte +15 °C-qa deıin) −3… +2 °C-qa deıin tómendeıdi, - dep habarlady aýa raıyn boljaýshylar.

Sondaı-aq bul aıdaǵy jaýyn-shashyn mólsheri normadan joǵary bolady. Naýryzdyń basynda qar jaýyp, burqasyn kútiledi, al aıdyń ortasyna qaraı jańbyr aralas qar jaýyp, kóktaıǵaq bolýy múmkin. Aı boıy aýyq-aýyq sekýndyna 15–20 metrge jetetin ekpindi jel soǵýy yqtımal.

Buǵan deıin SQO-da naýryzda aýa raıy qandaı bolatynyn jazǵanbyz.