«Ertis» óz alańynda «Ordabasydan» jeńildi

ASTANA. QazAqparat. Búgin fýtboldan el birinshiliginde 18-týr máresine jetti. Bul týrda Almatynyń «Qaıraty» Taldyqorǵannyń «Jetisýyn», Pavlodardyń «Ertisi» Shymkenttiń «Ordabasy» klýbtaryn qabyldady, dep habarlaıdy QazAqparat tilshisi.

Almaty qalasyndaǵy kezdesýde goldar ekinshi kezeńde soǵyldy. Aldymen «Jetisý» oıynshysy Devıd Mavýtor 66-mınýtta óz qaqpasyna gol soǵyp alsa, araǵa eki mınýt salyp Marton Eppel esepti 2:0-ge jetkizdi. Al 90-mınýtta «Jetisý» esep aıyrmasyn qysqartýǵa múmkindik aldy. Gol avtory  Eljas Altynbekov. Osylaısha «Qaırat» birinshi orynda kele jatuan «Astanamen» upaı aıyrmasyn 6 upaıǵa deıin qysqartty. Eskerte ketelik, «Qaırat» «Astanadan» eki oıyn kem ótkizgen.

Pavlodardaǵy kezdesý jańbyrǵa baılanysty belgilengen merziminen jarty saǵatqa kesh bastaldy. Sońǵy ýaqytta «Ertis» burynǵydaı oıyn órnegin kórsete almaı keledi. Sonyń saldarynan qazir týrnır kestesinde 10-orynda tur. Bul joly da sondaı sátsizdik jalǵasty. Aldymen qonaqtar esp ashty. Kezdesýdiń 43-mınýtynda «Ordabasy» oıynshysy Erkebulan Tuńǵyshbaev óz komandasyn alǵa shyǵardy. Al 77-mınýtynda «Ertis» sapynan Karlos Fonseka tarazy basyn teńestirgen edi. Degenmen 89-mınýtynda shymkenttiń fýtbolshy Temirlan Erlanov jeńis dobyn soǵyp, «Ordabasyǵa» aýadaı qajetti úsh upaıdy syılady.

Bul týrdaǵy qalǵan tórt oıyn keshe ótkizildi. «Qaısar» «Tobylmen» 2:2 esebimen teń tússe, «Aqjaıyq» «Qyzyljardy», «Astana» «Shahterdi» 2:0 esebimen tize búktirdi. Al «Aqtóbe» «Atyraýdy» 5:1 esebimen oısyrata jeńdi.

Kelesi týr oıyndary 21 jáne 22 shilde kúnderi ótkiziledi. 21 shildede «Shahter» men «Qaısar», «Jetisý» men «Aqtóbe», «Atyraý» men «Aqjaıyq», 22 shildede «Tobyl» men «Ertis», «Ordabasy» men «Qaırat» kezdesedi. Al «Astana» bul týr oıynyn 25 sáýirde «Qyzyljarmen» ótkizip, 2:0 esebimen basym túsken edi.