Erlan Qarın: Jańa Quryltaı depýtattaryna tarıhı jaýapkershilik júktelip otyr
ASTANA. KAZINFORM — Vıtse-prezıdent Erlan Qarın Quryltaı quramy 80 paıyzǵa jańarǵanyn aıtty.
— Jańadan qurylǵan bir palataly Quryltaı óz jumysyn bastady. Buǵan deıingi shaqyrylymmen salystyrǵanda Quryltaı quramy shamamen 80%-ǵa jańardy. Sonymen qatar, zań shyǵarýshy organǵa ótken áıelder men jastardyń sany edáýir artty, — dep jazdy ol Instagram-daǵy paraqshasynda.
Erlan Qarın Quryltaıdyń jańa quramyna tarıhı jaýapkershilik júktelgenin atap ótti.
— Shyn máninde, halyq qalaýlylary tarıhı oqıǵanyń bel ortasynda júr. Olar alǵashqy Quryltaıdyń qurylýyna kýá bolyp, onyń qyzmetine tikeleı qatysýda. Osy turǵydan alǵanda, bul úlken mártebe ári zor jaýapkershilik dep bilemin. Prezıdentimiz Qasym-Jomart Kemeluly Toqaev aıtqandaı, memleketimizdiń saıası júıesiniń jańarý úderisi dál osy Quryltaıdan bastalady. Sondyqtan, depýtattarǵa tarıhı jaýapkershilik júktelip otyr, — dedi Vıtse-prezıdent.
Ol saıası partııalardyń fraktsııa jetekshilerimen kezdesip, birlesken jumystyń baǵyt-baǵdaryn talqylaǵandaryn aıtty.
— Qalyptasqan dástúrge sáıkes, jańa sessııanyń basynda saıası partııalardyń fraktsııa jetekshilerimen kezdesip, birlesken jumystyń baǵyt-baǵdary jóninde pikir almastyq. Óz kezeginde olar úgit-nasıhat naýqany kezinde saılaýshylar tarapynan kóterilgen máselelerdi ortaǵa saldy. Fraktsııa jetekshilerimen aldaǵy ýaqytta da dál osylaı jınalyp, oı bólisip turýǵa ýaǵdalastyq. Sebebi, ashyq ári turaqty dıalog — tıimdi jumystyń kepili, — dep túıindedi Qarın.
Eske salsaq, 31 tamyzda Memleket basshysy Qasym-Jomart Toqaev Vıtse-prezıdent laýazymyna Erlan Qarınniń kandıdatýrasyn usyndy.
Óz kezeginde Quryltaı Vıtse-prezıdent laýazymyna Erlan Qarınniń kandıdatýrasyn qoldady.
Prezıdent Erlan Karındi Vıtse-prezıdent etip taǵaıyndaý týraly Jarlyqqa qol qoıdy.
Keıinnen Toqaev Erlan Qarınniń jańa qyzmetindegi mindetterin aıqyndady.
