Erlan Qarın Vatıkan delegatsııasymen kezdesip, II birlesken kollokvıýmnyń ashylýyna qatysty
ASTANA. KAZINFORM – Vıtse-Prezıdent – Álemdik jáne dástúrli dinder lıderleri sezi Hatshylyǵynyń basshysy Erlan Qarın Qasıetti Taqtyń Dinaralyq dıalog jónindegi dıkasterııasynyń prefekti, kardınal Djordj Djeıkob Kývakadpen kezdesti. Bul týraly Aqorda habarlady.
Kardınal Astanaǵa II birlesken kollokvıýmǵa qatysý úshin Qasıetti Taq delegatsııasyn bastap keldi.
Kezdesý barysynda Kollokvıým men Sezd aıasyndaǵy ózara is-qımyl máseleleri, sondaı-aq birlesken gýmanıtarlyq bastamalardy júzege asyrý jaıy talqylandy.
Kardınal Djordj Kývakad Prezıdent Qasym-Jomart Toqaevqa Rım Papasy HІV Leonyń ystyq yqylaspen joldaǵan sálemin jáne Qazaqstan halqyna arnaǵan izgi tilegin jetkizdi.
Kezdesý qorytyndysy boıynsha Erlan Qarın men kardınal Djordj Kývakad aýyr ári jazylmaıtyn dertke shaldyqqan balalardyń ómirin, densaýlyǵy men qadir-qasıetin qorǵaýǵa arnalǵan II birlesken kollokvıýmnyń ashylý rásimine qatysty.
Іs-sharaǵa memlekettik organdardyń, dinı uıymdardyń, medıtsına, ǵylym jáne bilim berý mekemeleriniń ókilderi, sondaı-aq sarapshylar jınaldy.
Kollokvıýmnyń ashylýynda sóz sóılegen Erlan Qarın dinaralyq dıalog naqty gýmanıtarlyq nátıjelerge baǵyttalýǵa tıis ekenin atap ótti. Sonymen qatar Memleket basshysy Qasym-Jomart Toqaevtyń basshylyǵymen júzege asyrylyp jatqan aýqymdy saıası jáne áleýmettik-ekonomıkalyq reformalarǵa toqtaldy.
Onyń aıtýynsha, júrgizilip jatqan ózgeristerdiń basty maqsaty – azamattardyń ál-aýqatyn arttyrý. Al balalardyń, ásirese, áleýmettik turǵydan eń osal toptaǵy balalardyń quqyqtary men múddelerin qorǵaý memlekettik saıasattaǵy mańyzdy basymdyqtyń biri sanalady.
Kollokvıýmǵa qatysýshylar Qazaqstan men Vatıkannyń birlesken bastamasy retinde usynylyp otyrǵan jazylmaıtyn dertke shaldyqqan balalardyń quqyqtary týraly hartııa jobasyn talqylady. Vıtse-Prezıdent qujatty ázirleýge qosqan úlesi úshin Dıkasterııa men «Bambıno Djezý» gospıtaline alǵys bildirip, aýrýhananyń bizdiń eldegi «University Medical Center» korporatıvtik qorymen yntymaqtastyǵyn atap ótti.
Sóz sońynda Vıtse-Prezıdent qatysýshylarǵa jemisti jumys pen mazmundy pikirtalas tiledi.
