Erlan Qarın ustazdardy qoldaýdyń nátıjelerin atap ótti
Vıtse-prezıdent Erlan Qarın Muǵalimder kúni kásibı mereke aıasynan áldeqashan shyǵyp, jalpyulttyq merekege aınalǵanyn atap ótti.
Ol Ustazdar kúni kásibı ataýly kún bolsa da, shyn mánisinde halyqtyq mereke sıpatyna ıe mereke ekenin atap ótti.
— 2023 jyly Memleket basshysy Qasym-Jomart Toqaevtyń sheshimimen 5 qazan — Ustazdar kúni bolyp naqty bekitildi. Sol ýaqyttan beri Prezıdenttiń muǵalimderdi «Aqordada» arnaıy qabyldap, quttyqtaýy ıgi dástúrge aınaldy. Memleket basshysy búgin de ardager ustazdarǵa, eńbegi eleýli pedagogterge, jetistikke jetken muǵalimderge aıryqsha qurmet kórsetti, — dep jazdy Erlan Qarın.
Jalpy, Qasym-Jomart Kemeluly Toqaev ustazdardyń mártebesin kóterip, olardy qoldaýǵa erekshe kóńil bólip keledi.
— Prezıdent retinde qabyldaǵan alǵashqy mańyzdy sheshimderiniń biri de muǵalimderge qatysty bolǵanyn jaqsy bilemiz. Onyń tikeleı bastamasymen «Pedagog mártebesi» týraly zań qabyldandy. Eń joǵary memlekettik nagrada — «Qazaqstannyń Eńbek Eri» ataǵy muǵalimderge berile bastady. Sol sekildi muǵalimderdiń eńbekaqysyn eselep arttyryp, saladaǵy básekelestikti jańa deńgeıge kóterdi.
Prezıdent tek muǵalimderge ǵana emes, jalpy bilim salasyna erekshe qoldaý kórsetip otyr. Keıingi 7 jyldyń ózinde elimizde 1301 jańa mektep ashyldy. Bul rette Qazaqstan jańa mektepter qurylysy jóninen Ortalyq Azııadaǵy kóshbasshy memleket ekenin atap ótken jón.
Barshańyzdy búgingi Ustazdar kúnimen shyn júrekten quttyqtaımyn! Memleket basshysy aıtqandaı, «Myqty muǵalim — sapaly ulttyń tiregi». Eldiń erteńgi bolashaǵyna, urpaq tárbıesine jaýapty muǵalimderge tolaıym tabys pen baq-bereke tileımiz, — dedi Vıtse-prezıdent.
Aıta ketelik búgin aıryqsha eńbegi úshin bir top muǵalim joǵary memlekettik nagradalarmen marapattaldy.
