Erlan Qarın: Ulttyq biregeılik pen birliktiń birden bir negizi — tutastyq
ASTANA. KAZINFORM — Qazaqstannyń vıtse-prezıdenti Erlan Qarın Prezıdenttiń qazaqtardy bólmeý týraly sózin qoldady. Ol qazaq qoǵamyndaǵy eski kózqarastardan arylýǵa shaqyrdy.
— Memleket basshysy Qasym-Jomart Toqaev búgin Qazaqstan Halyq Keńesiniń birinshi sessııasyna qatysty. Jıynda bir saǵattan astam ýaqyt sóz sóıledi. Birqatar taqyryptardy qamtyp, óz oı-pikirin ortaǵa saldy. Kóptegen azamat baıqaǵan bolar, Prezıdent sońǵy ýaqytta sóılegen sózderiniń barlyǵynda eldi eleń etkizer, talqyǵa túrtki bolar oılaryn ashyq aıtyp júr. Osyǵan deıin Prezıdenttiń tarıhty tek qasiret retinde kórsetý, jańa ádepterdi qalyptastyrý, tazalyqty saqtaý týraly pikirleri qoǵamda qyzý talqylanǵanyn bilemiz, — dep jazdy ol Instagram-daǵy paraqshasynda.
Erlan Qarın qoǵamdy tejeıtin eski narratıvterden bas tartý kerek ekenin aıtty.
— Memleket basshysy búgin de aýyl men qalany bólmeý, adamdardy «asfaltta» ósken qazaqtar, shala qazaqtar, naǵyz qazaqtar dep alalamaý týraly oıymen bólisti. Munyń bári kezinde qalyptasyp ketken, búginde ábden eskirgen, ulttyń damýyna keri áser etetin narratıvter. Shyn máninde, Prezıdent kópshiliktiń kókeıinde júrgen dúnıeni aıtty dep oılaımyn. Ony Halyq Keńesiniń jıynyna qatysqan adamdardyń quptap, qoldaǵanynan-aq baıqaýǵa bolady, — dedi vıtse-prezıdent.
Ol ulttyq biregeılik pen birliktiń birden bir negizi — tutastyq, ıaǵnı, azamattardy bólip-jarmaý, jik-jikke bólmeý ekenin alǵa tartty.
— Memleket basshysy búgingi jıyndaǵy oı-pikiri arqyly qoǵamda ornyqqan keıbir ustanymdar men jekelegen qundylyqtardy qaıta qaraý kerek ekenin ańǵartty. Rasynda, ulttyń jańa sapasyn qalyptastyryp, biregeıligimizdi odan ári nyǵaıtamyz desek, qoǵamnyń damýyn tejeıtin keıbir ekiushty kózqarastardan bas tartqan abzal. Ulttyq biregeılik pen birliktiń birden bir negizi — tutastyq, ıaǵnı, azamattardy bólip-jarmaý, jik-jikke bólmeý. Sondyqtan Prezıdent aıtqan oıdyń túpki máni ulttyq mentalıtet pen psıhologııada qalyptasyp ketken osyndaı keselderden arylý kerektiginde bolyp tur. Muny da endigi jerde nazarǵa alýǵa tıispiz, — dep túıindedi Qarın.
Osydan buryn Qazaqstan Halyq Keńesiniń birinshi sessııasynda Prezıdent Qasym-Jomart Toqaev qarańǵylyqtan basqa bereri joq eskilik ustanymdaryna qatań tosqaýyl qoıýymyz kerek ekenin aıtqan edi.
