Erlan Qarın: Til normalaryna qatysty máselemen eń aldymen ǵalymdar men sala mamandary aınalysýǵa tıis

ASTANA. KAZINFORM — Vıtse-Prezıdent Erlan Qarın Memleket basshysy Qasym-Jomart Toqaevtyń Halyqaralyq «Qazaq tili» qoǵamynyń H quryltaıynda bergen tapsyrmalaryn júzege asyrý maqsatynda til ǵalymdarymen jáne sala sarapshylarymen kezdesip, til normalaryna qatysty máselemen tek ǵalymdar men sala mamandary ǵana aınalysýǵa tıis ekenin málimdedi.

Erlan Qarın: Til normalaryna qatysty máselemen eń aldymen ǵalymdar men sala mamandary aınalysýǵa tıis
Foto: Kazinform

— Qazaq tiliniń damýyna qatysty máseleler eń aldymen ǵalymdar men til mamandarynyń arasynda pysyqtalýy kerek. Áýeli ǵalymdardyń tájirıbesi men bilimi, osy saladaǵy kásibı qaýymdastyqtyń saraptamasy bolýǵa tıis. Árbir sheshim ǵylymı dálelge, tildiń ishki zańdylyqtaryna jáne qoǵamnyń naqty qajettilikterine súıenýi shart, — dedi Erlan Qarın.

Eske sala keteıik, bir apta buryn Memleket basshysy «Qazaq tili» qoǵamynyń quryltaıyna qatysyp, jurtshylyqqa baǵdarlamalyq sıpattaǵy sózin arnaǵan bolatyn. Sondaı-aq, memlekettik tildiń órkendeýine qatysty óziniń tujyrymdamalyq oılarymen bólisti. Birqatar ózekti máselege nazar aýdaryp, naqty tapsyrmalar berdi. Atap aıtqanda, Prezıdent qazaq tiliniń emlesin jáne erejesin júıeleý, sózdikterdi jańartý, qoldanystaǵy sózder men uǵymdardyń birizdiligin retteý, sózdik qorymyzdy tsıfrlyq formatqa kóshirý sekildi asa mańyzdy máselelerge keńinen toqtaldy.

Memleket basshysynyń osy tapsyrmalaryn júzege asyrý maqsatynda Sarapshylar toby qurylady. Onyń quramyna A.Baıtursynuly atyndaǵy Til bilimi ınstıtýtynyń qyzmetkerleri, joǵary oqý oryndarynyń bilikti til mamandary, ǵalymdar, sarapshylar, ІT salasynyń ókilderi enbek.