Erlan Qarın tarıhshylar atynan Memleket basshysyna alǵys aıtty
ASTANA. KAZINFORM — Prezıdent Ákimshiligi basshysynyń birinshi orynbasary Erlan Qarın Qazaqstan tarıhynyń kóptomdyq akademııalyq basylymyn ázirleý jónindegi Redaktsııalyq alqanyń qorytyndy otyrysynda tarıhshylar atynan Memleket basshysy Qasym-Jomart Toqaevqa alǵys aıtty.
— Qasym-Jomart Kemeluly otandyq tarıh máselelerine erekshe kóńil bólip keledi. Prezıdenttiń jańa bastamalary men ıdeıalary otandyq tarıh ǵylymyna túbegeıli betburys ákeldi. 4-5 jyl ishinde kem degende on jyl boıy atqarylatyn jumystar birden qolǵa alynyp, júzege asyryla bastady. Osy jyldar aralyǵynda tól tarıhymyzdy jańǵyrtýda úlken betburys jasaldy. Sonyń biri — Qazaqstan tarıhynyń akademııalyq kóptomdyǵy. Sondyqtan, osyndaı irgeli isterge bastamashy bolyp, oǵan bárimizdiń qatysýymyzǵa múmkindik bergeni úshin tarıhshylar qaýymdastyǵy atynan jáne redaktsııalyq alqa músheleri atynan Memleket basshysy Qasym-Jomart Kemelulyna alǵys bildirýge ruqsat etińizder, — dedi Erlan Qarın Redaktsııalyq alqanyń qorytyndy 14-shi otyrysynda.
Eske sala keteıik, buǵan deıin Memleket basshysynyń bastamasymen Saıası qýǵyn-súrgin qurbandaryn tolyq aqtaý jónindegi memlekettik komıssııa qurylyp, 2,5 mıllıonnan astam arhıvtik materıaldan qupııalylyq grıfi alynyp tastaldy.
Sondaı-aq, Prezıdent shet memleketterdiń arhıvteri men kitaphanalarynda saqtalǵan Qazaqstan tarıhyna qatysty qujattardy elge ákelýge bastamashylyq etti. Bul is «Arhıv-2025» jobasy aıasynda júzege asyryldy.
Aıta ketelik «Qazaqstan tarıhy: ejelgi dáýirden búginge deıin» atty jeti tomdyq akademııalyq basylym maquldanǵan edi.
