Erlan Qarın Prezıdentke ishki saıasattyń negizgi baǵyttary boıynsha esep berdi
ASTANA. KAZINFORM — Memleket basshysy Vıtse-Prezıdentti qabyldady, dep habarlaıdy Aqordanyń baspasóz qyzmeti.
Qasym-Jomart Toqaev Vıtse-Prezıdent Erlan Qarınniń ishki saıasattyń basym baǵyttaryn júzege asyrý, Prezıdent tapsyrmalaryn oryndaý men bastamalaryn ilgeriletý, sonyń ishinde birinshi shaqyrylǵan Quryltaıdyń alǵashqy sessııasynyń ashylýynda jáne Qazaqstan Halyq Keńesiniń birinshi sessııasynda aıtylǵan mindetterdi iske asyrý jónindegi esebin tyńdady.
Atap aıtqanda, Vıtse-Prezıdent konstıtýtsııalyq qundylyqtardy túsindirý jáne nasıhattaý, «Taza Qazaqstan» jobasyn júzege asyrý, jańa qoǵamdyq etıka qalyptastyrý, «Zań men tártip» qaǵıdatyn ilgeriletý, «Adal azamat» biryńǵaı tárbıe baǵdarlamasyn engizý boıynsha atqarylǵan jumystar jóninde baıandady.
Sondaı-aq Memleket basshysyna etnosaralyq kelisimdi nyǵaıtý, balalardyń quqyǵy men múddesin qamtamasyz etý, memlekettik aqparattyq saıasatty jetildirý sekildi ishki saıasattyń negizgi baǵyttary jóninde málimet berildi.
Kezdesý sońynda Prezıdent konstıtýtsııalyq qaǵıdattar men qundylyqtar ulttyq bolmys pen qoǵamdyq mádenıettiń ajyramas bóligine aınalýǵa tıis ekenin atap ótip, birqatar tapsyrma berdi.
Qasym-Jomart Toqaevtyń aıtýynsha, patrıotızm, jaýapkershilik, eńbekqorlyq, birlik jáne azamattardyń jasampaz maqsattar jolynda judyryqtaı jumylýy elimizdi qarqyndy damytýdyń mańyzdy alǵysharttary sanalady.
Buǵan deıin Memleket basshysy World Aquatics prezıdentin ІІ dárejeli «Dostyq» ordenimen marapattaǵanyn jazǵanbyz.
