Erlan Qarın Prezıdent Joldaýyndaǵy bastamalardy zańnamalyq qoldaýǵa basymdyq berdi
ASTANA. KAZINFORM — Vıtse-Prezıdent Erlan Qarın Quryltaıdaǵy partııa fraktsııalarynyń jetekshilerimen kezdesip, Prezıdent Joldaýyndaǵy strategııalyq bastamalardy zańnamalyq turǵydan qamtamasyz etý máselelerin talqylady. Bul týraly Aqordanyń baspasóz qyzmeti málim etti.
Erlan Qarın Prezıdent sóılegen sózinde keler urpaqtyń múddesi úshin júzege asyrylatyn júıeli ózgeristerge basa nazar aýdarǵanyn atap ótti. «Halyqtyq qurylys» mindetteri halyqtyq tsıfrlyq ekonomıkany damytýmen tyǵyz sabaqtastyrylyp, Joldaýdyń ón boıynan kórinis tapty. Memleket kúsh-jigerin búkil azamattyq ınfraqurylymdy jańǵyrtýdyń irgeli máselelerine shoǵyrlandyryp otyr.
Vıtse-Prezıdenttiń aıtýynsha, memleket qordalanǵan júıeli problemalardy birtindep sheship, bolashaqtaǵy damýdyń berik negizin qalaýda.
— Prezıdent Joldaýda strategııalyq mańyzy bar jańa bastamalardy kóterdi. Olar Quryltaı tarapynan sapaly zańnamalyq qamtamasyz etýdi talap etedi. Osy baǵytta partııa fraktsııalarymen birlesip, tıimdi jumys isteýge daıynbyz, — dedi Erlan Qarın.
Partııa fraktsııalarynyń jetekshileri Joldaýda kóterilgen bastamalardy qoldap, ashyq ári syndarly yntymaqtastyqqa jáne birlesken jumysqa daıyn ekenin málimdedi.
Kezdesýge «Ádilet» partııasy fraktsııasynyń jetekshisi Erbol Adaev, «Aýyl» partııasy fraktsııasynyń jetekshisi Qaırat Aıtýǵanov, «Respublica» partııasy fraktsııasynyń jetekshisi Aıdarbek Qojanazarov, «Aq jol» partııasy fraktsııasynyń jetekshisi Danııa Espaeva, Jalpyulttyq sotsıal-demokratııalyq partııa fraktsııasynyń jetekshisi Ashat Rahymjanov, sondaı-aq Prezıdenttiń Quryltaıdaǵy Ókildiginiń basshysy Murat Qaıyrbek qatysty.
