Erlan Qarın Prezıdent Joldaýyn iske asyrýdyń úsh negizgi mindetin atady
ASTANA. KAZINFORM — Erlan Qarın Prezıdent Ákimshiligi men memlekettik organdar ókilderi qatysqan keńeste Memleket basshysynyń Joldaýyn iske asyrýdyń úsh negizgi baǵytyn belgiledi. Olar — strategııalyq josparlardy ázirleý, zańnamalyq qamtamasyz etý jáne aqparattyq-túsindirý jumysy. Bul týraly Aqorda málim etti.
Eń aldymen Erlan Qarın Prezıdent Qasym-Jomart Toqaevtyń Joldaýda kótergen bastamalary elimizdiń jańa tarıhı kezeńdegi damýynyń irgetasyn qalaıtynyn atap ótti.
— Memleket basshysynyń Joldaýy — mańyzdy strategııalyq qujat. Prezıdent usynǵan bastamalar kólik ınfraqurylymy men energetıkadan bastap, tsıfrlandyrý jáne agrarlyq sektorǵa deıingi túrli salalardaǵy memlekettik saıasattyń irgeli basymdyqtaryn aıqyndaıdy. Osylaısha, Memleket basshysy belgilegen naqty mindetter aldaǵy birneshe jylǵa arnalǵan jalpyulttyq kún tártibin qalyptastyrady. Atap aıtqanda, bular — Halyqtyq qurylys, tsıfrlyq ekonomıkany kezeń-kezeńimen qalyptastyrý, memlekettik basqarý júıesin aýqymdy reformalaý jáne basqa da bastamalar, — dedi Erlan Qarın.
Vıtse-Prezıdenttiń aıtýynsha, tıisti memlekettik organdar Prezıdent bastamalary men tapsyrmalaryn sapaly oryndaýǵa basa nazar aýdarýǵa tıis.
— Memleket basshysynyń kóptegen bastamasy strategııalyq sıpatqa ıe ári mıllıondaǵan azamattyń ózekti máselelerin sheshýge baǵyttalǵan. Sondyqtan Prezıdent tapsyrmalarynyń edáýir bóligi áleýmettik ınfraqurylymdy jańǵyrtýǵa jáne onyń qoljetimdiligin qamtamasyz etýge, eń tómengi jalaqyny arttyrýǵa, ınflıatsııamen kúresýge, ádil salyq saıasatyn júrgizýge, shaǵyn jáne orta bıznesti, muǵalimder men medıtsına qyzmetkerlerin qoldaýǵa, ınklıýzıvti damýdy qamtamasyz etýge jáne basqa da mańyzdy mindetterge baǵdarlanǵan. Infraqurylymdy aýqymdy jańartý baǵdarlamasynyń Joldaýda «Halyqtyq qurylys» dep atalýy kezdeısoq emes. Óıtkeni barlyq nysan halyqtyń jáne keler urpaqtyń ıgiligine qyzmet etedi. Bul baǵdarlamanyń máni men maqsatyn túsindiretin óte mańyzdy jaıt, — dedi Erlan Qarın.
Keńes qorytyndysy boıynsha Vıtse-Prezıdent tıisti memlekettik organdardyń aldyna Memleket basshysynyń Joldaýyn iske asyrýǵa qatysty aldyńǵy kezektegi mindetterdiń úsh negizgi baǵytyn belgiledi.
Birinshi mindet — Memleket basshysynyń tapsyrmalaryn júıeli iske asyrý jónindegi strategııalyq qujattar men josparlardy ýaqtyly ázirleý.
Ekinshi mindet — Prezıdenttiń áleýmettik mańyzy bar bastamalaryn zańnamalyq turǵydan sapaly qamtamasyz etý.
Úshinshi mindet — tıimdi aqparattyq-túsindirý jumysyn uıymdastyrý.
Vıtse-Prezıdent osy mindetterdi nátıjeli oryndaý úshin memlekettik apparatty belsendi ári úılesimdi jumys isteýge shaqyrdy.
