Erlan Qarın memlekettik baılanys ortalyqtarynyń jumysyn jaqsartýdy tapsyrdy
ASTANA. KAZINFORM — Aqordada Vıtse-prezıdent Erlan Qarınniń tóraǵalyǵymen memlekettik organdardyń baılanys ortalyqtarynyń jumysyn jetildirý, halyqpen keri baılanys ornatýdyń jańa quraldaryn engizý jóninde keńes ótti.
Aqordanyń habarlaýynsha, jıynǵa Qazaqstan Respýblıkasynyń Bala quqyqtary jónindegi ýákili, Prezıdent Ákimshiliginiń ótinishterdi qaraýdy baqylaý bóliminiń meńgerýshisi, Qazaqstan strategııalyq zertteýler ınstıtýtynyń, Bas prokýratýranyń, Eńbek jáne halyqty áleýmettik qorǵaý mınıstrliginiń, Qarjy mınıstrliginiń, Jasandy ıntellekt jáne tsıfrlyq damý mınıstrliginiń qurylymdyq bólimsheleriniń ókilderi qatysty.
Erlan Qarın Memleket basshysynyń tapsyrmasyna sáıkes barlyq salada tsıfrlyq tehnologııalar men jasandy ıntellekt quraldary qarqyndy engizilip jatqanyn atap ótti.
— Prezıdenttiń eldi aýqymdy tsıfrlandyrý jónindegi bastamasy memlekettik organdar jumysynyń halyqpen tıimdi keri baılanys ornatý sekildi mańyzdy baǵytyn da qamtıdy, — dedi Erlan Qarın.
Vıtse-prezıdent aıtyp ótkendeı, memleket halyqpen keri baılanys ornatýdyń aýqymdy ári fýnktsıonaldy ınfraqurylymyn qalyptastyrdy. Máselen, jyl saıyn respýblıka boıynsha Halyqqa qyzmet kórsetý ortalyqtary (HQKO) arqyly 30 mıllıonnan astam qyzmet kórsetiledi, al memlekettik baılanys ortalyqtary jylyna 21 mıllıonnan astam qońyraý qabyldaıdy.
Sonymen qatar júrgizilgen taldaý nátıjeleri óńirlik I-Komek baılanys ortalyqtarynyń jumysynda aımaqtar arasynda aıtarlyqtaı alshaqtyq bar ekenin kórsetip otyr. Máselen, 2025 jyly azamattardan túsken 4 mıllıon qońyraýdyń jartysynan astamy elordaǵa tıesili. Óńirlik baılanys ortalyqtaryndaǵy jumys tıimdiliginiń tómendigi azamattardy kúndelikti máseleleriniń sheshimin respýblıkalyq «e-Otinish» platformasy arqyly izdeýge májbúrleıdi. Sonyń saldarynan aqparat jergilikti atqarýshy memlekettik organdarǵa edáýir keshigip túsedi. Bul óz kezeginde halyqty alańdatqan ózekti máselelerdi sheshý ýaqytyna keri áserin tıgizedi.
— Sondyqtan, eń aldymen, elordalyq I-Komek ortalyǵynyń oń tájirıbesin ózge óńirlerge keńinen taratyp, olardyń kúndelikti máselelerdi sheshý baǵytyndaǵy jumysynyń tıimdiligin arttyrý qajet, — dedi Erlan Qarın.
Keńes barysynda memlekettik organdardyń ókilderi front-ofısterdiń, onyń ishinde «E-Otinish» platformasynyń, «111» baılanys ortalyǵynyń, HQKO-lar men azamattardy qabyldaý ortalyqtarynyń qyzmeti týraly aqparat berdi.
— Keıingi ýaqytta memlekettik organdardyń memlekettik qyzmetterdi tsıfrlandyrý, jańa tehnologııalardy memlekettik basqarý júıesine engizý baǵytyndaǵy jumysy edáýir kúsheıdi. Búginde memlekettik organdardyń front-ofısin biryńǵaı platformaǵa biriktirý, sondaı-aq jasandy ıntellektige negizdelgen zamanaýı quraldardy engizý basty mindetterdiń birine aınalyp otyr. Bul azamattardyń ótinishterin qaraý tıimdiligin arttyryp, Prezıdent bastamalary men azamattarymyzdyń ótinishterin jedelirek sheshýge múmkindik beredi, — dedi Erlan Qarın.
Vıtse-prezıdent keńes qorytyndysy boıynsha memlekettik organdar jumysynyń proaktıvti formatta júrgizilýin qamtamasyz etý jáne halyqpen keri baılanys arnalarynyń jumysyn jetildirý baǵytynda naqty tapsyrmalar berdi.
Eske salaıyq, buǵan deıin Erlan Qarın Qazaqstandaǵy eskertkishterdiń mazmundyq jáne maǵynalyq sapasyn arttyrý boıynsha júıeli jumys bastalatynyn málimdegen edi.
