Erlan Qarın Qazaqstannyń ishki saıasatyndaǵy negizgi úsh basymdyqty atady
ASTANA. KAZINFORM — Qazaqstannyń ishki saıasatyndaǵy negizgi basymdyqtar konstıtýtsııalyq qundylyqtardy nyǵaıtý, jańa qoǵamdyq etıkany qalyptastyrý jáne bolashaqqa umtylysty kúsheıtýge baǵyttalýy tıis. Bul týraly QR Vıtse-Prezıdenti Erlan Qarın aıtty.
Vıtse-Prezıdent ishki saıasattyń basymdyqtary retinde qundylyqtar men etıkany sondaı-aq bolashaqty atady.
Birinshi — konstıtýtsııalyq qundylyqtar. Bular Prezıdent Qasym-Jomart Toqaev reformalarynyń strategııalyq baǵytynyń negizin quraıdy.
— Bul — Zań jáne Tártiptiń ústemdigi, jalpyulttyq birlik, etnosaralyq jáne konfessııaaralyq kelisim, mádenıet jáne bilim, ǵylym jáne ınnovatsııalar, eńbekqorlyq jáne progress qundylyqtary, qorshaǵan ortaǵa qamqorlyq, jaýapty ári jasampaz patrıotızm. Salalyq organdar Prezıdenttiń «Qazaqstan Respýblıkasynyń ishki saıasatynyń negizgi qaǵıdattaryn, qundylyqtary men baǵyttaryn bekitý týraly» Jarlyǵyn jáne Memleket basshysynyń tapsyrmasy boıynsha qabyldanǵan Konstıtýtsııany ilgeriletý jónindegi is-sharalar josparyn tyńǵylyqty túrde iske asyrýǵa basa nazar aýdarýǵa tıis. Ata Zańnyń negizgi erejelerin túsindirip, konstıtýtsııalyq qundylyqtardy dáripteýge qatysty júıeli saraptamalyq-ádistemelik, aqparattyq jáne mádenı-aǵartýshylyq jumystar júrgizý qajet, — deıdi Vıtse-Prezıdent.
Ekinshi — jańa qoǵamdyq etıka. Bul qoǵamda progressıvti normalar men minez-qulyq úlgilerin ornyqtyrýdy, ózindik qundylyqtar negizin nyǵaıtýdy, qoǵamdyq ómirdi keri tartýǵa jáne tarıhı faktilerdi burmalaýǵa baǵyttalǵan áreketterge qarsy turýdy bildiredi.
— «Zań jáne Tártip» qaǵıdatyn praktıkalyq turǵyda iske asyrýǵa, «Taza Qazaqstan» jobasyn sapaly júrgizýge jáne «Adal azamat» tárbıe baǵdarlamasyn tıimdi júzege asyrýǵa erekshe nazar aýdarylýǵa tıis. Jumystyń jańa tásilderi men formattary qajet. Atap aıtqanda, biryńǵaı tsıfrlyq platforma qurý, ulttyq tazalyq standarty men óńirlerdiń tazalyq reıtıngin engizý arqyly Prezıdenttiń «Taza Qazaqstan» bastamasyn keń aýqymda iske asyrý kerek, — dedi Erlan Qarın.
Úshinshi — bolashaqqa umtylys. Bul — ǵylym men bilim, ınnovatsııalar men tehnologııalar, mádenıet pen aǵartýshylyq arqyly adam kapıtalyn damytýǵa basa mán berý.
— Tujyrymdamalyq baǵyt Memleket basshysynyń bastamasymen ázirlengen strategııalyq qujattarda aıqyndalǵan. Bul — eń aldymen «Qazaqstan balalary», «Oqıtyn ult», «Digital Qazaqstan» jáne basqalary. Negizgi maqsat — bolashaqqa senimmen qaraıtyn kúshti memleket pen progressıvti qoǵam qurý. Osylaısha, úsh basymdyqtyń barlyǵy biz qandaı qoǵam quryp jatyrmyz jáne qandaı elde ómir súremiz degen basty suraqtarǵa jaýap beredi. Bul úshin jasampaz kún tártibi men konstıtýtsııalyq qundylyqtardy ustanýymyz kerek, — dedi ol.
Buǵan deıin Erlan Qarın «Adal azamat» baǵdarlamasynyń mazmunyna ózgerister engizilip jatqanyn habarlaǵan edi.
