Erlan Qarın: Qazaqstan óziniń tarıhı jáne rýhanı murasyn zertteýdi júıeli túrde qolǵa aldy

ALMATY. KAZINFORM — Almatydaǵy Ábý Nasyr ál-Farabıdiń fılosofııalyq jáne ǵylymı murasyna arnalǵan «Fılosofııa. Etıka. Bolashaq» atty halyqaralyq sımpozıýmǵa qatysqan Vıtse-prezıdent Erlan Qarın aýqymdy ári mańyzdy ǵylymı is-shara eki jylda bir ret turaqty túrde uıymdastyrylatynyn jetkizdi. 

Erlan Qarın: Qazaqstan óziniń tarıhı jáne rýhanı murasyn zertteýdi júıeli túrde qolǵa aldy
Foto: Aqorda

— Prezıdent Túrkistanda — ıAsaýı, Almatyda ál-Farabı murasyna arnalǵan halyqaralyq sımpozıýmdardy budan bylaı turaqty túrde uıymdastyrýdy tapsyrdy. Sondyqtan, eki úlken tulǵaǵa arnalǵan mundaı jıyndar kezekpenen eki jylda bir ret ótkiziledi. Bul — rýhanı muramyzdy naýqandyq emes, ınstıtýtsıonaldyq deńgeıde júıeli ári keshendi zertteýge kóshkenimizdi kórsetedi. Qazaqstan óziniń tarıhyn, rýhanı murasyn zertteýdi, nasıhattaýdy júıeli túrde qolǵa alyp jatyr. Bul — aǵartýshylyq baǵyttaǵy úlken betburystyń belgisi, — dedi Erlan Qarın.

Vıtse-prezıdent halyqaralyq sımpozıýmnyń ashylýynda Memleket basshysy Qasym-Jomart Toqaevtyń quttyqtaý hatyn oqyp berdi.

Prezıdent jıynǵa qatysýshylarǵa joldaǵan hatynda uly oıshyldardyń ozyq ıdeıalaryn tereń zerdelep, óskeleń urpaq arasynda keńinen nasıhattaýdyń, sondaı-aq onyń bárin zamanaýı ǵylym turǵysynan paıymdaýdyń mańyzdy ekenine nazar aýdarǵan.

Eske salaıyq, buǵan deıin Erlan Qarın Mereke Qulkenovpen qazaq ádebıetiniń damýyn talqylaǵan edi.