Erlan Qarın eńbek adamdarynyń jetistigin turaqty nasıhattaýdy tapsyrdy
ASTANA. KAZINFORM — Vıtse-Prezıdent ıdeologııalyq keńestiń kezekti otyrysyn ótkizdi. Bul týraly Aqordanyń baspasóz qyzmeti habarlady.
Aqordada Vıtse-Prezıdent Erlan Qarınniń tóraǵalyǵymen ıdeologııalyq keńestiń kezekti otyrysy ótti. Jıynǵa Prezıdent Ákimshiligi qurylymdyq bólimsheleriniń jáne áleýmettik-mádenı jáne aqparattyq bloktarǵa jetekshilik etetin ortalyq memlekettik organdardyń basshylary qatysty.
Otyrysta ishki saıasattyń qazirgi kún tártibi qaralyp, aldaǵy ýaqytta ótetin Eńbek kúni sekildi negizgi is-sharalarǵa daıyndyq barysy egjeı-tegjeıli pysyqtaldy.
Vıtse-Prezıdent qoǵamda eńbekqorlyq pen órkendeý ıdeologııasyn ilgeriletý baǵytyndaǵy qarqyndy jumysty jalǵastyrý qajet ekenin aıryqsha atap ótti.
– Memleket konstıtýtsııalyq qundylyqtardy jan-jaqty ilgeriletýde. Bul qatarda eńbekqorlyq pen progress, jumysshy mamandyqtar ókilderine qurmet kórsetý de bar. Prezıdent Qasym-Jomart Toqaev jasampaz eńbek ıdeologııasyn nasıhattaýǵa aıryqsha mán berip, óz isiniń maıtalmandaryn, eńbek áýletteriniń ókilderin joǵary memlekettik nagradalarmen marapattap keledi.
Osy oraıda, aqparattyq keńistikte eńbek adamdarynyń jetistikteri men ǵumyr jolyn únemi nasıhattap, olardyń elimizdiń ozyq damýyna qosyp otyrǵan úlesin atap kórsetken jón. Otandyq IT-jobalardyń, startaptardyń tabysty nátıjelerine, jańa tsıfrlyq tehnologııalardyń engizilýine aıryqsha nazar aýdarý qajet. Bul jumys belgili bir is-sharalarmen ǵana shektelmeı, turaqty ári júıeli túrde júrgizilýge tıis.
– Túpki maqsat – Prezıdent aıqyndap bergendeı, eńbekqorlyqty ulttyq sıpatymyzdyń ajyramas bóligine aınaldyrý, – dedi Erlan Qarın.
Keńes qorytyndysy boıynsha Vıtse-Prezıdent jaýapty memlekettik organdarǵa ishki saıasattyń qazirgi kún tártibine qatysty naqty tapsyrmalar berdi. Sondaı-aq Memleket basshysynyń barlyq bastamasy men tapsyrmasynyń tıimdi iske asyrylýyn qamtamasyz etip, olardyń oryndalýyn baqylaýdy odan ári jalǵastyrý qajet ekenin aıtty.
