Erlan Qarın elordadaǵy WTT Star Contender týrnıriniń jeńimpazdaryn marapattady
ASTANA. KAZINFORM — Vıtse-prezıdenti Erlan Qarın Astanada alǵash ret ótken ústel tennısinen WTT Star Contender sanatyndaǵy halyqaralyq týrnırdiń jeńimpazdary men júldegerlerin marapattaý rásimine qatysty.
— Osy kúnderi elimiz ústel tennısinen kezekti halyqaralyq iri týrnırdi qabyldady. Astanada tuńǵysh ret WTT Star Contender sanatyndaǵy doda uıymdastyryldy. Jarys Qazaqstan Respýblıkasy Prezıdentiniń Ashyq Kýbogy aıasynda ótti, — dep jazdy Erlan Qarın.
Bul týrnırge álemniń 29 elinen 160 sportshy qatysty.
Erlan Qarın áleýmettik jelidegi jazbasynda fınaldyq oıyndardy tamashalap, jeńimpazdar men júldegerlerdi marapattaý rásimine qatysqany týraly jarııalady.
— Mundaı aýqymdy týrnırdi elimizde ótkizýdiń mańyzy zor. Birinshiden, bul jastardy sportqa yntalandyryp, tennıske degen qyzyǵýshylyǵyn arttyrady, — dedi Vıtse-prezıdent.
Erlan Qarın bul jarystyń 2027 jyly Qazaqstanda ótetin ústel tennısinen álem chempıonaty qarsańynda mańyzdy ekenin atap ótti.
— Búgingi týrnır álem birinshiligi aldyndaǵy óz aldyna bir daıyndyq ispetti. Qazaqstan ústel tennısinen jahan chempıonatyn qabyldaıtyn Ortalyq Azııadaǵy alǵashqy el bolmaq, — dedi Vıtse-prezıdent.
Aıta keteıik, elimizde ústel tennısinen Qazaqstan Prezıdentiniń ashyq kýbogi 15-20 qyrkúıek aralyǵynda elordadaǵy Jaqsylyq Úshkempirov atyndaǵy jekpe-jek saraıynda ótti.
Buǵan deıin Memleket basshysy Halyqaralyq ústel tennısi federatsııasynyń (ITTF) prezıdenti Petra Serlıngti qabyldady.
