Erlan Qarın Djekı Chanmen halyqaralyq kınojobanyń bolashaǵyn talqylady
ASTANA. KAZINFORM — Vıtse-Prezıdent Erlan Qarın halyqaralyq kınojobanyń túsirilim tobymen kezdesti, dep habarlaıdy Aqordanyń baspasóz qyzmeti.
Memleket basshysynyń tapsyrmasy boıynsha Vıtse-Prezıdent Erlan Qarın halyqaralyq kınojobanyń túsirilim toby múshelerimen kezdesti. Kezdesýge álemge áıgili rejısser ári kınoakter Djekı Chan, sondaı-aq sheteldik jáne qazaqstandyq prodıýserler Esmond Ren, Rústem Omarov, Igor Tsaı jáne Orynbasar Qudaıbergenov qatysty.
— Kezdesý barysynda kınematografııa salasyndaǵy halyqaralyq yntymaqtastyqty damytý máseleleri, sondaı-aq birlesken kınojobalardy odan ári júzege asyrý múmkindikteri talqylandy, — delingen habarlamada.
Erlan Qarın Prezıdent Qasym-Jomart Toqaevtyń kreatıvti ındýstrııany damytýǵa jáne azamattardyń shyǵarmashylyq áleýetin pash etý úshin jaǵdaı jasaýǵa erekshe kóńil bólip otyrǵanyn atap ótti.
Vıtse-Prezıdent iri halyqaralyq kınojobalardyń Qazaqstanda túsirilýi otandyq kınoındýstrııanyń damýyna, jergilikti mamandardyń kásibı múmkindikterin shyńdaýǵa jáne halyqaralyq kınoóndiris úshin elimizdi áleýetti alań retinde tanytýǵa yqpal etetinin atap ótti.
Kezdesýde kıno salasyndaǵy jańa tehnologııalardy damytý baǵytyna da erekshe nazar aýdaryldy. Erlan Qarın Memleket basshysynyń sheshimimen jarııalanǵan bıylǵy Tsıfrlandyrý jáne jasandy ıntellekt jylynda elordada Astana AI Film Festival ótkenin jetkizdi. Oǵan álemniń 125 elinen 8 myń ótinim kelip tústi. Qatysýshylardyń aýqymy men geografııasy jaǵynan bul festıval AІ-kınoǵa arnalǵan álemdegi eń iri is-shara retinde tanyldy.
Kezdesý sońynda Erlan Qarın Djekı Chanǵa Qazaqstanǵa degen aıryqsha yqylasy úshin alǵys aıtyp, jobaǵa qatysýshylardyń aldaǵy shyǵarmashylyq jumysyna tabys tiledi.
Budan buryn habarlanǵandaı, Mańǵystaýda shilde aıynda Djekı Chan qatysatyn fılmniń túsirilimi bastaldy.
