Erlan Qarın búgin Májilis maquldaǵan esirtkimen kúresýdi kózdeıtin zań jobasy týraly aıtty
ASTANA. KAZINFORM - Parlament Ulttyq quryltaıda kóterilgen bastamalardy júzege asyrý aıasynda kezekti zań jobasyn qarady. Bul týraly Memlekettik keńesshi Erlan Qarın málimdedi.
«Memleket basshysy Atyraýda sóılegen sózinde esirtki zattaryn óndirgen adamdardyń jazasyn barynsha kúsheıtip, mundaı áreketti asa aýyr qylmystarǵa teńestirýdi usyndy.
Búgin Májilis birinshi oqylymda esirtkiniń, psıhotroptyq zattardyń jáne olardyń prekýrsorlarynyń zańsyz aınalymyna qarsy is-qımyl máseleleri boıynsha ózgerister men tolyqtyrýlar engizý týraly depýtattar ázirlegen zań jobasyn maquldady.
Zań jobasyna sáıkes esirtki óndirýdi jáne ony ótkizýdi uıymdastyratyn adamdarǵa qylmystyq jaýapkershilik kúsheıtilip, ómir boıy bas bostandyǵynan aıyrý jazasy qarastyrylǵan. Sondaı-aq sıntetıkalyq esirtkiniń quramdas bólikteriniń zańsyz aınalymyna qatysty jaýapkershilik engiziledi», — delingen Erlan Tynymbaıulynyń jazbasynda.
Onyń paıymynsha, bul qadam astyrtyn esirtki zerthanalaryn anyqtaýǵa jáne olardyń jolyn kesýge múmkindik beredi.
«Úkimet byltyr nashaqorlyqpen kúresý jáne elimizde esirtkige táýeldi adamdardyń sanyn azaıtý úshin Nashaqorlyqqa jáne esirtki bıznesine qarsy kúreske qatysty keshendi jospar bekitken bolatyn. Májiliste qaralǵan zań jobasy osy baǵyttaǵy jumysty jandandyrýǵa jol ashady», — deıdi Memlekettik keńesshi.