Erlan Qarın bıyl Abaı atyndaǵy memlekettik syılyq ne úshin berilmeıtinin túsindirdi
ASTANA. KAZINFORM — Vıtse-Prezıdent Erlan Qarın komıssııa tóraǵasy retinde Abaı atyndaǵy ádebıet pen óner salasyndaǵy memlekettik syılyqty berý jónindegi komıssııanyń sońǵy sheshimi týraly túsinikteme berdi.
Erlan Qarın memlekettik syılyq tulǵaǵa emes, týyndyǵa beriletin syılyq ekenin atap ótti. Aıtýynsha, bıyl daýys berý qorytyndysyna sáıkes birde-bir jumys komıssııa músheleriniń basym daýsyna ıe bola almaǵan.
— Birinshiden, konkýrsqa túsken úmitkerlerdiń barlyǵyn syılaımyz, qurmetteımiz. Olar tól rýhanııattyń damýyna úlken úles qosyp kele jatqan belgili tulǵalar. Ózim de birqataryn jeke tanımyn. Biraq Memlekettik syılyq – tulǵaǵa emes, týyndyǵa beriletin syılyq. Osynyń arajigin ajyratyp alǵan durys. Ataqty bireýge unaý nemese jaǵý úshin, renjip qalmasyn degen sebeppen beretin bolsaq, óner odan damymaıdy, bul ataqtyń mártebesi artpaıdy. Ekinshiden, bárimiz tártipke baǵynýymyz qajet. Usynylǵan týyndylardyń barlyǵy daýysqa salyndy. Biraq daýys berý qorytyndysy boıynsha birde-bir jumys Komıssııa músheleriniń aıqyn basym daýysyna ıe bola alǵan joq. Kerisinshe, jumystardy qoldamaǵandar men qalys qalǵandardyń úlesi basym boldy, - dedi Vıtse-Prezıdent.
Erlan Qarın buǵan deıin de laıyqty jumystardyń bolmaýyna baılanysty memlekettik syılyq berilmegen jaǵdaı bolǵanyn atap ótti. Sonymen birge memlekettik syılyq tártibi men erejesine ózgeris engiziletinin aıtty.
— Mysaly, 2023 jyly gýmanıtarlyq ǵylymdar salasyndaǵy A.Baıtursynuly atyndaǵy memlekettik syılyq laıyqty jumystardyń joqtyǵyna baılanysty berilgen joq. Sondyqtan konkýrs bolǵasyn onyń nátıjesinde ártúrli bolýy múmkin, ony durys qabyldaý kerek. Úshinshiden, otyrystyń sońynda Abaı atyndaǵy memlekettik syılyqqa tutastaı reforma kerek ekeni aıtyldy. Bul pikirdi kesheli beri jeli qoldanýshylary da qoldap jazyp jatyr. Shynynda da, memlekettik syılyqty berý tártibi qazirgi kezeńniń talaptaryna sáıkes kelmeıdi. Syılyqtyń talap, tártibi ǵana emes, mazmuny men sıpaty da ózgerýi kerek. Mysaly, álemdegi eń bedeldi Nobel syılyǵy 50 ne 70 jasqa tolǵany úshin emes, jańalyq pen jańashyldyq úshin beriledi. Sol sııaqty Abaı atyndaǵy memlekettik syılyqty mereıtoı ıesine, úmitkerdiń materıaldyq jaǵdaıyna jáne basqadaı sebepterge baılanysty usyný jalpy durys emes. Sondyqtan memlekettik syılyq tártibi men erejesine úlken ózgeris engizemiz. 2000 jyldardan beri qaraı eseptesek, Abaı atyndaǵy memlekettik syılyq 60-qa jýyq adamǵa berilgen eken. Demek, shyǵarmashylyq salanyń osynshama ókiline memleket tarapynan úlken qoldaý kórsetildi degen sóz. Onyń ústine Prezıdent Qasym-Jomart Toqaevtyń sheshimimen memlekettik syılyq ıegerlerine beriletin qarajat artty. Demek, bedeldi syılyqqa usynylatyn týyndylar da osyǵan laıyq bolýy shart, - dedi Erlan Qarın.
Bıyl Abaı atyndaǵy memlekettik syılyq berilmeıtin buǵan deıin jazǵan bolatynbyz.
